Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 128 Hüküm no: 135 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Dimitri’nin borcunu ödemesi 120 guruşa hüküm Ma‘rûz Neccâr tâifesinin Karaman kolu neferâtından Kozma v. Yasef nâm zimmî İstanbul Bâb Mahkemesi’nde meclis-i şer‘-i hatîrde Terzi Dimitri v. Tanaş nâm zimmî muvâcehesinde ben bundan akdem mesfûr Dimitri zimmînin Havâss-ı refî‘a kazâsına muzâfe kasaba-i Hasköy’de Kılıçcı Ahmed Çelebi mahallesinde vâki‘ ma‘lûmü’l-hudûd mutasarrıf olduğu bir bâb Yahûdihanesini binâ ve inşâ etdiği esnâda neccârlık etmemle müddet-i ma‘lûmede ücret-i mu‘ayyenem ile bi-şartı’r-rücû‘ emriyle ma‘lûmü’l-esâmî neccâr << ve rençberler>> ve rençberlere mâlımdan medfû‘âtımın hesâbını bundan akdem zimmî-i mersûm ile rü’yet eylediğimizde benim mersûm Dimitri zimmî zimmetinde bin üç yüz yirmi [16b] üç guruş alacak hakkım zuhûr edip meblağ-ı mezkûrun beş yüz guruşunu mukaddemâ mesfûrun yedinde kabz ve istîfâ etmemle bâkīsi olan sekiz yüz on altı guruşu mesfûr Dimitri zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim olan meblağ-ı mezkûr sekiz yüz on altı guruşun altı yüz doksan altı guruşunu dahi mukaddemâ ceste ceste müdde‘î-i mersûma edâ ve teslîm etmemle ancak zimmetimde yüz yirmi guruş deynim bâkī kalmışdır deyü müdde‘î-i mersûmun inkârına mukārin eylediği def‘ine ikāmet-i beyyine edemeyip bi’t-taleb mesfûr Kozma zimmîye bi’l-muvâcehe ber-nehc-i şer‘î yemîn teklîf olundukda ol dahi yemînden nükûl etmeğin mûcebince mesfûr Kozma zimmî ziyâde altı yüz doksan altı guruş müdde‘âsıyla mesfûr Dimitri zimmîye bî-vech-i şer‘î mu‘arazadan <> ba‘de’l-men‘ sâlifü’l-beyân mersûm Dimitri zimmînin ikrârıyla lâzım gelen meblağ-ı bâkī-i mezkûr yüz yirmi guruşun müdde‘î-i mersûm Kozma zimmîye edâsıyla mersûm Dimitri zimmî ilzâm olunduğu mübâşirleri Bâb-ı Seraskerî kavaslarından Kasımpaşalı Yusuf Kavas kulları yediyle huzûr[-ı âlîlerine i‘lâm olundu] Fî 16 Şa‘bân sene [12]55