.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 102
Hüküm no: 78
Orijinal metin no: [18a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Heybeliada’daki hafristânın bir parçasının Dimitri v. Mihal’e satılmasının kanunlara uygun olup olmadığının araştırılması

Ma‘rûz,

Sâdır olan fermân-ı âlîlerine imtisâlen medîne-i Üsküdar muzâ[fâ]tından Adalar nâhiyesinde vâki‘ Heybeliada’da livâdiye ta‘bîr olunur hafristân nâm mahâllin bir mikdârını ada-i mezbûr re‘âyâsından Dimitri v. Mihal zimmî semen-i ma‘lûme bundan akdem bir takrîb iştirâ edip bir kaç def‘a kahvehâne ihdâsına şurû‘ ve ada-i mezbûr re‘âyâsı bi-ecmâ‘ihim mahâll-i nizâ‘ üzerinde akd olan meclis-i şer‘a varıp kadîmden berü hafristânımız olan mahalle kahvehâne binâsı muzır ve ada-i mezkûre re‘âyâsının nizâmına halel geleceği zâhir olmağla mahâll-i mezkûra kahvehâne binâ ve ihdâsının men‘ u def‘ olunması husûsu mersûm Dimitri zimmî muvâcehesinde da‘vâ ve kahvehâne-i mezkûre ihdâsının men‘ u def‘ine tenbîh-i şer‘î eylediğini Adalar nâhiyesinde nâibi es-Seyyid Mehmed Şemseddin Efendi dâ‘îleri işbu mührü mutâbık bir kıt‘a i‘lâm ile inhâ etmiş ise de mahâll-i mezkûr kadîmden berü mülkiyet üzere hüccet-i şer‘iye ile bey‘ ü şirâ olunur makūleden midir yoksa arâzî-i mîrîyeden olup sahib-i arz olanların tapu temessükleriyle ferâğ ve intikāl olunur makūleden midir ve sahib-i arz olan kimesne mahâll-i nizâ‘ üzerinde hazır olup izni var mıdır i‘lâmdan münfehim olmamağla husûs-ı mezkûre mahâllinde tahkīk olunarak isti‘lân muhtâc olduğu huzûr-ı âlîlerine i‘lâm olundu. Bâkī fermân hazret-i men-lehu’l-emrindir.

Fi’l-yevmi’t-tâsi‘ ve’l-işrîn min-Muharremi’l-harâm sene tis‘a ve erba‘în ve mieteyn ve elf.