.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 103
Hüküm no: 79
Orijinal metin no: [18a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Seyyid İsmail’in Ladik kazasındaki Seyfi Dede Zaviyesi zâviyedarlığı görevini hakkıyla ifa ettiğinden bu görevin kendisinden alınmaması

Ma‘rûz-ı dâ‘î-i Devlet-i aliyyeleridir ki,

Sâdır olan fermân-ı âlîlerine imtisâlen Ladik kazâsında Şeyhli karyesinde vâki‘ Seyfi Dede Zâviyesi’nin zâviyedârlığına evlâdiyet ve meşrûtiyet üzere bâ-berat-ı âlîşân mutasarrıf olup dahl ü ta‘arruz olunmak îcâb etmez iken es-Seyyid İsmail nâm kimesne huzûra gelip bir takrîb kendi üzerine berat ettirip kendüye gadr olunduğundan bahisle merkūm İsmail’in ref‘inden sahib-i evveli olmak hasebiyle kendüye tevcîh ve yedine müceddeden bâ-berat-ı şerîf-i âlîşân sadaka ve ihsân olunmak bâbında sahib-i arzuhâl es-Seyyid Mehmed dâ‘îleri istid‘â-yı inâyet eder fi’l-hakīka Ladik kazâsında Şeyhli karyesinde vâki‘ Seyfi Dede Zâviyedârlığı âyende vü revendeye it‘âm-ı ta‘âm etmek şartıyla evlâd-ı evlâd-ı evlâda meşrûta olup zâviyedârlık-ı mezbûre ber-vech-i meşrûta evlâd-ı vâkıfdan es-Seyyid İsmail b. İsmail bâ-berat-ı âlî mutasarrıf iken mezbûr İsmail bilâ-veled fevt olduğunu ve kendüyü evlâd-ı vâkıfdan olduğunu beher kimesneler hilâf-ı vâki‘ inhâ ve ihbâr ederek zâviyedârlık-ı mezbûr merkūm İsmail’in bilâ-veled fevtinden mezbûr es-Seyyid Mehmed’e tevcîh olundukdan sonra merkūm es-Seyyid İsmail diyâr-ı âharda bulunup zuhûr etmekle isbât-ı vücûd ederek zâviyedârlık-ı mezbûr merkūm es-Seyyid Mehmed’in ref‘inden sahib-i evveli mezbûr es-Seyyid İsmail’e ibkāen berat verilip el-yevm zâviyedârlık-ı mezkûre ber-vech-i meşrûta mezbûr es-Seyyid İsmail b. es-Seyyid İsmail’in bâ-berat-ı âlî üzerinde olduğu derkenârdan müstebân olmağın bu sûretde mezbûr es-Seyyid İsmail b. es-Seyyid İsmail hizmet-i lâzımesini bî-kusûr mer‘î ve müeddâ kıldıkdan sonra bilâ-mûcib üzerinden ref‘i gayr-ı meşrû‘ idiği huzûr-ı âlîlerine i‘lâm olundu. Bâkī emr [ü] fermân hazret-i men-lehu’l-emrindir.

Fi’l-yevmi’l-hâmis aşer min-Saferü’l-hayr li-sene tis‘a ve erba‘în ve mieteyn ve elf.