Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 134 Hüküm no: 144 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa’nın borcunu ödemesi 4500 guruşa sulh Ma‘rûz İstanbul’da Kellekesen Hanı’nda sâkin hayriye tüccârlarından bâ‘isü’l-i‘lâm Hasekizâde es-Seyyid el-Hâc Hüseyin Efendi b. es-Seyyid el-Hâc İsmail İstanbul Bâb Mahkemesi’nde meclis-i şer‘-i münîrde astarcı esnâfından es-Seyyid Ömer Ağa b. es-Seyyid el-Hâc Mehmed Emin nâm kimesne muvâcehesinde mezbûr es-Seyyid Ömer Ağa zimmetinde semen-i mebî‘den ba‘de külli’l-hesâb yedi bin yirmi guruş alacak hakkım olup hattâ meblağ-ı mezkûr zimmetinde bana deyni olduğunu merkūm es-Seyyid Ömer Ağa ikrâr ve karz ünvânıyla işbu mümzâ ve mahtûm bir kıt‘a temessüğü dahi yedime i‘tâ etmişidi el-hâletü hâzihî meblağ-ı mezkûrun iki bin beş yüz yirmi guruşunu zahr-ı temessük mantûkunca mukaddemâ ceste ceste kabz ve istîfâ etmemle bâkīsi olan dört bin beş yüz guruşu merkūm es-Seyyid Ömer Ağa’dan hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin mûcebince meblağ-ı bâkī-i mezkûr dört bin beş yüz guruş merkūm es-Seyyid Ömer Ağa’dan tahsîl ve müdde‘î-i mezbûr el-Hâc Hüseyin Efendi’ye teslîm ettirilmek iktizâ eyledi[ği] mübâşirleri Bâb-ı Seraskerî kavaslarından Hasan Kavas kulları yediyle huzûr[-ı âlîlerine i‘lâm olundu] Fî 25 Şa‘bân sene [12]55