Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 135 Hüküm no: 145 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Hasan Ağa’nın eski hanımı Fâtıma’ya kıymetli eşya ve altın emanet ettiği halde geriye alamadığı yolundaki iddiasını ispatlayamadığı Mu‘ârazadan men‘ Ma‘rûz Uncu esnâfından Hasan Ağa b. Abdullah nâm kimesne İstanbul Bâb Mahkemesi’nde meclis-i şer‘-i münîrde mu‘arrefetü’z-zât Fâtıma bt. Abdullah nâm hatun muvâcehesinde mezbûre Fâtıma Hatun ile mukaddemâ zevciyyet beynimizde kāime iken mâlımdan mecmû‘u iki bin guruş kıymetli sîm üzerine masnû‘ Dîvânhâne enseri ta‘bîr olunur iki aded elmas iğne ve bir gül yüzük ve altın üzerine masnû‘ bir çift zümrüd küpe ile sekiz yüz yetmiş üç guruşluk ecnâs altınımı mezbûre Fâtıma Hatun’un yedine li-ecli’l-hıfz îdâ‘ ve teslîm eylediğimde ol dahi yedimden ahz u kabz ve bana vermeyip yedinde mevcûde ise aynlarını müstehleke ise ba‘de’s-sübût zikr olunan iğne ve yüzük ve küpelerin kıymetleriyle altının emsâlini mezbûre Fâtıma Hatun’dan tazmîn taleb ederim deyü da‘vâ ettikde ol dahi cevâbında külliyen inkâr etmekle müdde‘î-i merkūm ber-vech-i muharrer müdde‘âsına ikāmet-i beyyine edemeyip bi’t-taleb mezbûre Fâtıma Hatun bi’l-muvâcehe ber-nehc-i şer‘î tahlîf olunmağın mûcebince müdde‘î-i merkūm Hasan Ağa da‘vâ-yı mezkûresiyle mezbûre Fâtıma Hatun’a bilâ-beyyine mu‘ârazadan men‘ olunduğu mübâşirleri Dîvân-ı âlî çavuşlarından Şerif Çavuş kulları yediyle huzûr[-ı âlîlerine i‘lâm olundu] Fî 23 Şa‘bân sene [12]55