|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 103 Hüküm no: 80 Orijinal metin no: [18a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Çorum’daki Mustafa Paşa Camii mütevellisi Osman b. Mehmed’e tevliyet beratını kaybettiğinden yenisinin verilmesi
Ma‘rûz,
Sâdır olan fermân-ı âlîlerine imtisâlen işbu arzuhâl ve derkenâra nazar olundakda vilâyet-i Anadolu’da Çorum kazâsında vâki‘ Mustafa Paşa Câmi‘-i şerîfinde üç aded eczâ vaz‘ eden ashâb-ı hayrâtdan Sâfî Mehmed Efendi Vakfı’nın ber-mûceb-i şart-ı vâkıf evlâdiyet ve meşrûtiyet üzere humus mahsûlüyle bâ-berât mütevellîsi olan sahib-i arzuhâl Osman b. Mehmed dâ‘îleri yedinde olan berat-ı şerîf-i âlîşân-ı mezkûr bir takrîb zâyi‘ olduğundan bahisle zâyi‘den yedine müceddeden bir kıt‘a berat-ı âlîşân inâyet ve ihsân buyurulmak ricâsında olduğu meâl-i arzuhâlden müstefâd ve tevliyet-i mezkûre merkūm Osman b. Mehmed’in el-yevm üzerinde olduğu askerî rûznâmçesi derkenârından müstebân ve sahib-i arzuhâl merkūm Osman b. Mehmed sahib-i berat olup evlâdiyet ve meşrûtiyet üzere tevliyet-i mezkûreye mutasarrıf olduğu kazâ-i mezbûr ahâlîsinden Dersa‘âdet’de müsâfireten sâkinler Ahmediye İmâmı Ahmed Efendi b. Musa ve Mustafa b. Mehmed nâm kimesnelerin alâ-tarîkı’ş-şehâde haberleriyle zâhir ve mütehakkık olmağın bu sûretde merkūm Osman dâ‘îleri yedine zâyi‘den müceddeden bir kıt‘a berat-ı şerîf-i âlîşân inâyet ve ihsân buyurulmak emr-i savâb idiğini huzûr-ı âlîlerine i‘lân olundu.
Fî 11 S sene 1249
|