Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 138 Hüküm no: 150 Orijinal metin no: [19a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’in kefalet süresi dolduğu için Pavli’den alacak tahsili talebinde bulunmasının geçersiz olduğu Kefâletden men‘ Ma‘rûz Arzuhâl eden Ahmed b. Ali nâm kimesne İstanbul Bâb Mahkemesi’nde meclis-i şer‘-i münîrde sarrâf tâifesinden derûn-ı arzuhâlde ismi mastûr Pavli v. Ligor nâm zimmî muvâcehesinde benim gāib ani’l-meclis Bakkāl Bedros v. Atam nâm zimmî zimmetinde cihet-i karzdan bâ-temessük alacak hakkım olan dört yüz yetmiş guruşa mesfûr Pavli zimmî işbu sene-i mübâreke Cumâdelûlâsı’nın beşinci günü kefîl olur oldukda bu günden on bir gün tamâmına dek kefîl olup on bir gün mürûr ettikden sonra kefâletden berî olmak üzere kefîl olmuşidi el-hâletü hâzihî işbu târîhe gelince yüz üç gün mürûr edip meblağ-ı mezkûr dört yüz yetmiş guruşu mersûm Pavli zimmî bana edâ etmemekle ol vechile meblağ-ı mezbûr dört yüz yetmiş guruşu mersûm Pavli zimmîden ber-vech-i muharrer kefâletine binâen hâlâ taleb ederim deyü takrîr-i meşrûhu üzere mesfûr Pavli zimmî târîh-i mezkûrdan on bir gün mürûrunda kefâletden halâs olmağla tasaddî eylediği da‘vâsı meşrû‘a ve iltifâta şâyân olmadığı müdde‘î-i merkūm Ahmed’e tefhîm ve da‘vâ-yı mezkûresiyle mersûm Pavli zimmîye bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 18 Şa‘bân sene [12]55