Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 139 Hüküm no: 152 Orijinal metin no: [19a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin’in kefaletinden doğan borcunu ödemesi 300 guruşa hüküm Ma‘rûz Canbâz tâifesinden Mehmed Nuri Ağa b. Mehmed nâm kimesne İstanbul Bâb Mahkemesi’nde meclis-i şer‘de Athamalı Mehmed Emin b. İsmail nâm kimesne muvâcehesinde yedimde olup işbu sene-i mübâreke Cumâdelâhiresi gurresi târîhiyle müverrah bir kıt‘a temessük mantûkunca gāib ani’l-meclis Hamal Mehmed b. İbrahim b. Abdullah zimmetinde bir re’s bârgir semeninden alacağım olan üç yüz guruşa mezbûr Mehmed Emin bundan akdem tarafeynden bi’l-emr ve’l-kabûl kefâlet-i mutlaka-i sahîha-i şer‘iye ile kefîl ve dâmin olmağla meblağ-ı mezkûru mezbûr Mehmed Emin’den kefâlet-i mahkiyesine binâen hâlâ taleb ederim deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince meblağ-ı mezkûr üç yüz guruşun müdde‘î-i merkūm Mehmed Nuri Ağa’ya bi-hükmi’l-kefâle edâ ve teslîme mezbûr Mehmed Emin ilzâm olunduğu mübâşirleri Bâb-ı Seraskerî kavaslarından Mehmed Kavas kulları yediyle huzûr[-ı âlîlerine i‘lâm olundu] Fî 22 Şa‘bân sene [12]55