Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 139 Hüküm no: 153 Orijinal metin no: [19a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Şerife Ayşe Hanım’a kocasına itaat etmesi hususunda tenbihte bulunulduğu
Zevcenin itâ‘atine tenbîh
Ma‘rûz
İstanbul’da Yenibahçe kurbünde Keçecipîrî mahallesinde sâkin es-Seyyid Ali b. Yusuf nâm kimesne İstanbul Bâb Mahkemesi’nde meclis-i şer‘-i münîrde hâlâ zevcesi mu‘arrefetü’z-zât Şerife Âişe bt. es-Seyyid Ahmed nâm kimesne [hatun] muvâcehesinde mezbûre Şerife Âişe Hatun altmış bir guruş mehr-i müeccel tesmiyesiyle zevce-i menkûha-i medhûlün-bihâm olup lâkin bana itâ‘at ve hukūk-ı zevciyyete mürâ‘at etmemekle suâl olunup mahalle-i mezbûrede vâki‘ tedârük ve müheyyâ eylediğim galak ve merâfıkı başka menzilime gelip bana itâ‘at ve hukūk-ı zevciyyete mürâ‘at etmek üzere zevcem mezbûre Şerife Âişe Hatun’a tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin mûcebince zevci müdde‘î-i mezbûrun tedârük eylediği menzil-i mezkûruna gidip itâ‘at ve hukūk-ı zevciyyete mürâ‘at etmek üzere mezbûre Şerife Âişe Hatun’a tenbîh olunduğu bi’l-iltimâs huzûr[-ı âlîlerine i‘lâm olundu]
Fî 22 Şa‘bân sene 1255
|