Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 140 Hüküm no: 154 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manifaturacı Kosti’nin borcunu ödemesi 2200 guruşa hüküm Ma‘rûz İstanbul’da Çarşı-yı kebîrde Varakçılar Hanı’nda sâkin bâ‘isü’l-i‘lâm Şalcı Yusuf Ağa b. Abdullah nâm kimesne İstanbul Bâb Mahkemesi’nde meclis-i şer‘-i münîrde malifaturacı tâifesinden Kosti v. Ligori nâm zimmî muvâcehesinde mersûm Kosti zimmî zimmetinde işbu târîh-i i‘lâmdan on beş gün mukaddem mâlımdan ve yedimden iştirâ ve kabz eylediği bir aded fermâyiş şal semeninden iki bin iki yüz guruş alacak hakkım olmağla meblağ-ı mezkûr iki bin iki yüz guruşu mersûm Kosti zimmîden hâlâ taleb ederim deyü ba‘de’d-da‘vâ ve’l-inkâr müdde‘î-i merkūm Yusuf Ağa ber-vech-i muharrer müdde‘âsını her biri lede’t-tezkiye adl ve makbûlü’ş-şehâde idikleri ihbâr olunan Şalcı es-Seyyid el-Hâc Ahmed Ağa b. es-Seyyid Mehmed ve Bezzâzistânî es-Seyyid İbrahim Ağa b. Ali ve el-Hâc Ahmed Ağa b. Veliyyüddin nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı mezkûr iki bin iki yüz guruşu müdde‘î-i merkūm Yusuf Ağa’ya edâ ve teslîme mersûm Kosti zimmîye tenbîh olunduğu mübâşirleri Bâb-ı Seraskerî kavaslarından Ali Kavas kulları yediyle huzûr[-ı âlîlerine i‘lâm olundu] Fî 21 Şa‘bân sene [12]55