Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 142 Hüküm no: 158 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abdullah Efendi’nin borçlarının terekesinden ödenmesi 60 guruşa sulh Ma‘rûz İstanbul’da Şehzâde Câmi‘-i şerîfi kurbünde Molla Kestel mahallesinde sâkin İdris b. Mustafa nâm kimesne tarafından ber-vech-i âtî vekîl olduğu İbrahim Efendi b. Mustafa ve Halil Ağa b. Osman nâm kimesne ber-nehc-i şer‘î sâbit olan sâhibe-i arzuhâl mu‘arrefetü’z-zât Nesibe bt. İdris nâm hatun İstanbul Bâb Mahkemesi’nde meclis-i şer‘de medîne-i Üsküdar’a tâbi‘ Karamürsel kasabasında misâfiren sâkin iken bundan akdem vefât eden Abdullah Efendi b. Abdullah nâm kimesnenin verâseti zevce-i menkûha-i metrûkesi Âişe bt. Ahmed nâm hatun ile sulbî kebîr oğulları Mehmed İzzet ve Mustafa Refik ve Ali Rıza’ya münhasıra olduğu lede’ş-şer‘i’l-enver zâhir ve nümâyân oldukdan sonra verese-i mezbûrûndan derûn-ı arzuhâlde mezkûretü’l-ism mu‘arrefetü’z-zât zevce-i mezbûre Âişe Hatun muvâcehesinde müvekkilim mezbûrun müteveffâ-yı merkūm Abdullah Efendi zimmetinde kasaba-i merkūmede vâki‘ bir bâb mülk menzil kirâsından iki yüz altmış guruş alacak hakkı olmağla meblağ-ı mezkûru merkūma hayatında kable’l-edâ fevt oldukdan sonra meblağ-ı mezkûrun altmış guruşunu merkūme Âişe Hatun’dan <> tereke-i müteveffâ-yı mezbûrdan [mezbûra] vâzı‘atü’l-yed olduğu hisse-i vâfiyesinden müvekkilim mezbûra edâ etmekle bâkīsi olan iki yüz guruşu dahi mezbûre Âişe Hatun’un hisse-i vâfiyesinden bi’l-vekâle hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūme ile kat‘an-li’n-nizâ‘ bi’t-tav‘ ve’r-rızâ altmış guruş bedel-i medfû‘ ve makbûza bi’l-vekâle ba‘de-akdi’l-musâlaha ve’l-kabûl mâ‘adâya ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini asâleten ve vekâleten kabûlü hâvî ibrâ ve iskāt eyledik deyü ikrâr ve tasdîkleri huzûr[-ı âlîlerine i‘lâm olundu] Fî 20 Şa‘bân sene [12]55