Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 142 Hüküm no: 159 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogos’un borcunu ödemesi 380 guruşa hüküm Ma‘rûz İstanbul’da Topkapı kurbünde Bayezidağa mahallesinde mütemekkine iken bundan akdem <> hâlike olan Nazar bt. Matiyos Nasrâniyenin sadriye sagīre kızı Takohi’nin min-kıbeli’l-üm ceddesi ve hâzinesi sâhibe-i arzuhâl ma‘rifetü’ş-şahs Sima bt. Repail Nasrâniye İstanbul Bâb Mahkemesi’nde meclis-i şer‘-i hatîrde derûn-ı arzuhâlde ismi mastûr güveyisi Aci Bogos v. Simo nâm zimmî muvâcehesinde güveyim mersûmun firâşından hâsıla ve kızım hâlike-i mersûmeden mütevellide ve bi-hakkı’l-hıdâne hâlâ hacr ü terbiyemde olan sulbiye kızı Takohi’nin bâ-hüccet-i şer‘iye beher şehr on ikişer guruş nafaka-i mefrûza-i müstedânesinden güveyim mersûm Aci Bogos zimmî zimmetinde sekiz yüz guruş alacak hakkım olmağla meblağ-ı mezkûru güveyim mesfûr Aci Bogos zimmîden bi’l-mürâca‘a hâlâ taleb ederim deyü tasaddî eylediğim da‘vâmdan bâ-tavassut-ı muslihîn güveyim mersûm Aci Bogos zimmî ile bi’t-tav‘ ve’r-rızâ üç yüz <> altmış guruş üzerine bi’t-terâzî sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr üç yüz altmış guruşu müdde‘iyye-i mersûme Sima Nasrâniyeye bi’t-taleb edâ ve teslîme mersûm Aci Bogos zimmîye tenbîh olunduğu huzûr[-ı âlîlerine i‘lâm olundu] Fî 28 Şa‘bân sene [12]55