|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 104 Hüküm no: 81 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Akşehir kazası Kızılca mahallesi mescidi imamı Seyyid Mustafa’nın vefatıyla yerine oğlu Hafız Seyyid Abdülhalim’in tayin edilmesi
Ma‘rûz,
Sâdır olan fermân-ı âlîlerine imtisâlen işbu arz ve derkenâra nazar olundukda medîne-i Akşehir kazâsı mahallâtından Kızılca mahallesinde vâki‘ mescid-i şerîfinde yevmî bir akçe vazîfe ile imâmet cihetine mutasarrıf olan Mustafa bilâ-veled fevt oldu diyerek hilâf-ı inhâ birle merkūm es-Seyyid Mustafa hayatında iken bilâ-veled mahlûlünden derûn-ı arzda mezkûrü’l-ism Hüseyin b. Ömer’e bin iki yüz kırk iki senesi Ramazanü’l-mübârek’de tevcîh ve yedine verilen berat-ı şerîf ketm u ihfâ ederek ve merkūm es-Seyyid Mustafa bu esnâda fevt olup sulbî kebîr oğlu Hâfız es-Seyyid Abdülhalim dâ‘îlerine ber-kānûn-ı kadîm intikāl ederken merkūm Hüseyin hilâf-ı inhâsıyla müteveffâ-yı merkūmun sulbî oğlu es-Seyyid Abdülhalim’e gadr ettirdiğinden bahisle merkūm Hüseyin’in ref‘inden müteveffâ-yı merkūmun sulbî kebîr oğlu es-Seyyid Abdülhalim dâ‘îlerine tevcîh ve yedine berat-ı şerîf i‘tâ olmağı kazâ-i mezbûr nâibi Müftizâde es-Seyyid Ahmed Şâkir Efendi dâ‘îleri işbu mührü mutâbık arz etmeğin fi’l-hakīka cihet-i mezkûre müteveffâ-yı merkūm Mustafa’nın mahlûlünden merkūm Hüseyin’e tevcîh olunup üzerinde olduğu derkenârdan müstebân ve merkūm es-Seyyid Mustafa’nın bu esnâda fevti vâki‘ ve es-Seyyid Hâfız Abdülhalim sulbî kebîr oğlu olduğu kazâ-i mezbûr ahâlîsinden Der-aliyye’de müsâfireten sâkinler İmirzeoğlu Musa b. İbrahim, Ahmed Beyzâde el-Hâc Ali b. Ali nâm kimesnelerin ale’t-tarîkı’ş-şehâde ihbâr ve mazmûn-ı arzı tasdîk etmeleriyle mütehakkık ve zâhir olmağın bu sûretde cihet-i mezkûre vazîfe-i mersûmesiyle ber-mûceb-i arz merkūm Hüseyin’in ref‘inden müteveffâ-yı merkūm es-Seyyid Mustafa’nın mahlûlünden sulbî kebîr oğlu es-Seyyid Hâfız Abdülhalim dâ‘îlerine tevcîh, yedine berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm olundu.
Fî 15 S sene [12]49
|