Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 143 Hüküm no: 161 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hurdacı Parsih’in Yorgi’den alacaklı olduğu yolundaki iddiasını ispatlayamadığı Men‘ Ma‘rûz Hurdacı tâifesinden Parsih v. Ohannes nâm zimmî İstanbul Bâb Mahkemesi’nde meclis-i şer‘-i hatîrde neccâr kalfalarından Yorgi v. Yorgi nâm zimmî muvâcehesinde benim mersûm Yorgi zimmî zimmetinde mismâr-ı mütenevvi‘a-i ma‘lûme esmânından ba‘de külli’l-hesâb gayr-ı ez-teslîmât sahhu’l-bâkī dört yüz elli guruş alacak hakkım olup <> onun dahi gāib ani’l-meclis Ahmed Efendi nâm kimesne zimmetinde cihet-i deyn-i şer‘îden ol mikdâr alacağı olmağla mezkûr Parsih zimmî işbu târîh-i i‘lâmdan iki ay mukaddem İstanbul’da Fazlıpaşa nâm mahâlde vâki‘ gāib-i merkūmun sâkin olduğu menzilinde üçümüz bir meclisde hâzır olduğumuz hâlde beni ol mikdâr guruş dâyini gāib-i merkūm Ahmed Efendi üzerine havâle-i sahîha-i şer‘iye ile havâle ve her birimiz havâle-i mezkûreyi kabûl etmişidik el-hâletü hâzihî meblağ-ı muhâlün-bih-i mezkûru gāib-i merkūm Ahmed Efendi bana hâlâ vermemekle meblağ-ı muhâlün-bih-i mezkûru mersûm Yorgi zimmîden hâlâ taleb ederim deyü tasaddî eylediği da‘vâsı takrîr-i meşrûhu üzere kable-tahakkuku’ş-şer‘î meşrû‘a ve iltifâta şâyân olmadığı müdde‘î-i mersûm Parsih zimmîye tefhîm, da‘vâ-yı mezkûresiyle mesfûr Yorgi zimmî[ye] bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 29 Şa‘bân sene [12]55