Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 145 Hüküm no: 165 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Sünbül’ün alacak davasından vazgeçtiği Ma‘rûz Arzuhâl eden Yağcı Sünbül v. Hıristo nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde mezkûrü’l-ism Çörekci es-Seyyid Mehmed b. Mehmed nâm kimesne muvâcehesinde benim çörekçi esnâfından olup İstanbul’da Tahtakale kurbünde bir bâb çörekçi dükkânında sâkin iken bundan akdem fevt olan Mehmed Ağa zimmetinde hayatında mâlımdan ve yedimden iştirâ ve kabz eylediği revgan-ı çerviş semeninden bin altı yüz seksen guruş alacak hakkım olup meblağ-ı mezkûru merkūm Mehmed Ağa kable’l-edâ ve’l-îfâ fevt olup mücerred merkūm es-Seyyid Mehmed müteveffâ-yı mezbûrun hemşehrisi olmağla öyle olacak benim müteveffâ-yı mezbûrun zimmetinde ber-vech-i muharrer alacağım olan meblağ-ı mezkûr bin altı yüz seksen guruşu bana mâlından edâ etmek üzere merkūm es-Seyyid Mehmed’e cebr olunsun deyü bundan akdem da‘vâya tasaddî etmişidim el-hâletü hâzihî takrîr-i meşrûhum üzere tasaddî eylediğim da‘vâm meşrû‘a ve iltifata şâyân olmadığı kıbel-i şer‘den bana tefhîm olunup ben dahi mücâb? ve nâdim olmamla bi’l-cümle husûs-ı mezkûra <> ve hukūk-ı sâire-i şer‘iyeye müte‘allika âmme-i da‘vâdan mezbûr es-Seyyid Mehmed’in zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledim deyü ikrâr ve tasdîkleri tescîl ve huzûr[-ı âlîlerine i‘lâm olundu] Fî 16 Şa‘bân sene [12]55