Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 147 Hüküm no: 167 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oseb v. Zafir’in borcunu ödemesi 1309 guruşa hüküm Ma‘rûz Rençber Bogos v. Karabet nâm zimmî İstanbul Bâb Mahkemesi’nde meclis-i şer‘de tüccâr tâifesinin İstanbul perâkendesi neferâtından Oseb v. Zafir nâm zimmî muvâcehesinde mersûmun zimmetinde gerek benim ücretimden ve gerek ma‘lûmü’l-esâmî ve’l-eşhâs rençberlere bi-şartı’r-rücû‘ emriyle mâlımdan medfû‘âtım olup alacağımın hesâbını bundan akdem rü’yet eylediğimizde mersûmun zimmetinde gayr-ı ez-teslîmât 1309 guruş > hakkım zuhûr edip meblağ-ı mezkûr zimmetinde mesfûr Oseb zimmî bana deyni olduğunu ikrâr ü i‘tirâf etmekle meblağ-ı mezkûr 1309 guruşu zimmî-i mersûmdan hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim olan meblağ-ı mezkûr 1309 guruşun 721 guruşunu mukaddem müdde‘î-i mersûma ceste ceste edâ ve teslîm etmemle bâkī zimmetinde [zimmetimde] 588 guruş deynim kalmışdır deyü müdde‘î-i mersûmun inkârına mukārin eylediği def‘ine mersûm Oseb zimmî ikāmet-i beyyine edemeyip bi’t-taleb mersûm Bogos zimmîye bi’l-muvâcehe vech-i şer‘î üzere yemîn verilmeğin mûcebince dâfi‘-i mersûm Oseb zimmî def‘-i mezkûruyla mersûm Bogos bilâ-beyyine mu‘ârazadan ba‘de’l-men‘ mersûm Oseb zimmînin sâlifü’l-beyân ikrârıyla lâzım gelen meblağ-ı mezkûr 1309 guruşun müdde‘î-i mersûm Bogos zimmîye edâsıyla mesfûr Oseb zimmî ilzâm olunduğu mübâşirleri Bâb-ı Seraskerî kavaslarından Fındıklı[lı] Küçük Osman Kavas kulları yediyle huzûr[-ı âlîlerine i‘lâm olundu] Fî-selhi Şa‘bân sene [12]55