.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 105
Hüküm no: 82
Orijinal metin no: [18b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Seydişehri kazasındaki Seyyid Harun-ı Veli Camii müezzinliğinin Mehmed b. Mehmed’e verilmesi

Ma‘rûz,

Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Anadolu’da medîne-i Seydişehri kazâsında medfûn Seyyid Harun-ı Veli hazretlerinin binâ eylediği câmi‘-i şerîfde yevmî yedi akçe vazîfe ile müezzinlik cihetine bi’l-iştirâk mutasarrıflar olan es-Seyyid Mahmud b. Mehmed ve Mehmed b. Mehmed nâm kimesnelerden merhûm es-Seyyid Mahmud yirmi beş seneden beri diyâr-ı âharda bulunmağla terk-i hizmet olduğunu ve müştereki merkūm Mehmed’in edâ-i hizmetde kusûru olmadığından nısf müezzinlik-i mezkûr vazîfe-i mersûmesiyle merkūm es-Seyyid Mahmud’un terk-i hizmetinden müştereki mezbûr Mehmed’e tevcîh olunmasını kazâ-i mezbûr nâibi Kâtibzâde Ali Rıza Efendi dâ‘îleri işbu mührü mutâbık arzıyla inhâ ve müezzinlik-i mezbûrun nısf hissesi mezbûr es-Seyyid Mahmud b. Mehmed’in ve nısf-ı âhar hissesi merkūm Mehmed b. Mehmed’in üzerinde olduğu derkenârdan müstebân ve merkūm es-Seyyid Mahmud’un yirmi beş seneden beri mevcûd olmadığından mâ‘adâ bir kimesneyi dahi tarafından edâ-yı hizmete tevkîl etmeyip terk-i hizmet eylediğini ve müştereki merkūm Mehmed b. Mehmed’in evkāt-ı hamsede edâ-yı hizmet eylediğini kazâ-i mezbûr ahâlîlerinden Dersa‘âdet’de müsâfiren sâkinler es-Seyyid Ahmed b. Abdullah ve es-Seyyid Hasan b. İbrahim ve diğer es-Seyyid Mahmud b. Feyzullah nâm kimesneler ale’t-tarîkı’ş-şehâde haber vermeleriyle nısf hisse-i müezzinlik vazîfe-i mersûmesiyle mezbûr es-Seyyid Mahmud’un ref‘inden müştereki olup erbâb-ı istihkākdan olan merkūm Mehmed b. Mehmed’e tevcîh ve yedine berat-ı şerîf-i âlîşân sadaka ve ihsân buyurulmak husûsu re’y-i sâmîlerine menût idiği huzûr-ı âlîlerine i‘lâm olundu. Bâkī emr u fermân hazret-i men-lehu’l-emrindir.

Fî 12 S sene [12]49