Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 148 Hüküm no: 169 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın Kahveci Ohannes’e emanet ettiği kıymetli eşyaların iadesi konusunda kendisiyle sulh olduğu 250 guruşa sulh Ma‘rûz Mültezim tâifesinden el-Hâc Hasan Ağa b. Ali nâm kimesne İstanbul Bâb Mahkemesi’nde meclis-i şer‘de Mercan çarşısında vâki‘ Emirler Hanı’nda Kahveci Ohannes v. Kosti nâm zimmî muvâcehesinde ben târîh-i i‘lâmdan iki gün mukaddem mâlımdan beş yüz yirmi guruş kıymetli çuka keseye mevdû‘ bir kehribâ çubuk takımı li-ecli’l-hıfz mersûm Ohannes zimmî yedine îdâ‘ ve teslîm eylediğimde ol dahi ber-vech-i muharrer istîd‘â ve tesellüm etmişidi el-hâletü hâzihî zikr olunan takım mevcûde ise aynını müstehleke ise bi’s-sübût kıymetini mersûm Hıristo zimmîden tazmîn taleb ederim deyü tasaddî eylediğim da‘vâmdan bâ-tavassut-ı muslihîn mersûm ile bi’t-tav‘ ve’r-rızâ iki yüz elli guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâya ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz elli guruşun müdde‘î-i merkūm el-Hâc Hasan Ağa’ya bi’t-taleb edâ ve teslîme mersûm Hıristo zimmîye tenbîh olunduğu mübâşirleri Bâb-ı Seraskerî kavaslarından Üsküdarlı Emin Kavas yediyle huzûr[-ı âlîlerine i‘lâm olundu] Fî 9 Ramazan sene [12]55