Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 152 Hüküm no: 176 Orijinal metin no: [22b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuşakçı Ahmed’in çeşitli kişilere olan borçlarını taksitlerle ödeyeceği 2970 guruş te’cîl i‘lâmı Ma‘rûz Sâhib-i arzuhâl Kuşakçı Ahmed b. Süleyman nâm kimesnenin ber-vech-i âtî dâyinlerinden olup derûn-ı arzuhâlde isimleri mezkûr kuşak semeninden altı yüz on üç guruş iddi‘â eden es-Seyyid Mehmed Ağa b. İbrahim ve kezâlik kuşak semeninden altı yüz guruş iddi‘â eden Mehmed b. Süleyman ve iplik semeninden yüz kırk sekiz guruş iddi‘â eden Halil b. Halil ve semen-i mebî‘den altı yüz yirmi altı guruş iddi‘â eden Mustafa b. Süleyman ve kuşak semeninden iki yüz yetmiş beş guruş iddi‘â eden diğer Mustafa b. Mehmed ile iplik semeninden iki yüz doksan bir guruş iddi‘â eden Ferhad Ağa b. Abdullah tarafından husûs-ı âtîde vekîl-i sâbitü’l-vekâlesi Mehmed Ağa b. İbrahim nâm kimesneler İstanbul Bâb Mahkemesi’nde meclis-i şer‘-i münîrde medyûn-ı merkūm Ahmed muvâcehesinde bizim müvekkil-i merkūmun merkūm Ahmed zimmetinde ber-minvâl-i muharrer min-haysü’l-mecmû‘ iki bin dokuz yüz yetmiş iki guruş alacak hakkımız olup lâkin meblağ-ı mecmû‘-ı mezkûru mezbûr Ahmed’in hâlâ bize edâya bir vechile iktidârı olmadığına mebnî te’cîle tâlib olduğunda biz dahi meblağ-ı mecmû‘-ı mezkûr iki bin dokuz yüz yetmiş iki guruşu iş bu târîh-i i‘lâmdan beş sene mürûrunda tamâmen bizimle müvekkili merkūma edâ ve teslîm etmek üzere rızâmızla medyûn-ı merkūm Ahmed’i bi’l-asâle ve bi’l-vekâle te’cîl eyledik deyü mukırrûn-ı asıl [ve] vekîl-i merkūmûnun bi’l-cümle takrîr-i meşrûhlarını mezbûr Ahmed tasdîk ve meblağ-ı mecmû‘-ı mezkûru ber-vech-i muharrer müeccelen dâyinleri asıl ve müvekkil-i merkūmûna edâya ta‘ahhüd eylediği huzûr[-ı âlîlerine i‘lâm olundu] Fî 27 Şa‘bân sene [12]55