|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 105 Hüküm no: 83 Orijinal metin no: [18b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Akdağ kazası Hasbek köyü camii imamı Mustafa b. Mehmed’in vefatıyla yerine Seyyid Ali’nin tayin edilmesi
Ma‘rûz,
Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Akdağ kazâsında Hasbek karyesinde el-Hâc Mehmed nâm sahibü’l-hayrı câmi‘-i şerîfinde vâkıf-ı mezbûr el-Hâc Mehmed Vakfı’ndan yevmî nîm akçe ve Mehmed b. Mehmed nâm sahibü’l-hayrın Âsiyâb Vakfı’ndan yevmî on akçe vazîfe ile câmi‘-i şerîf-i mezkûrda bâ-berât imâm olan Mustafa b. Mehmed fevt olup mahlûlünden imâmet-i mezkûre vazîfe-i mersûmeleriyle kendüye tevcîh olunmasını es-Seyyid Ali b. es-Seyyid Salih dâ‘îleri işbu arzuhâliyle istid‘â ve imâmet-i mezkûre vazîfe-i mersûmeleriyle el-yevm bâ-berât merkūm Mustafa b. Mehmed’in üzerinde olduğu derkenârda müstebân ve husûs-ı mezkûr kazâ-i mezbûr ahâlîsinden Dersa‘âdet’de müsâfireten sâkinler Mehmed b. Mustafa ve Osman b. Mustafa nâm kimesnelerden istihbâr olundukda merkūm Mustafa’nın fevti vâki‘ ve Ömer Efendi ismiyle bir nefer sulbî kebîr oğlu olup mezbûr Ömer Efendi nüvvâbdan ve el-yevm kazâ-i mezbûrda hâkimü’ş-şer‘i’ş-şerîf olduğundan cihet-i mezkûreye rağbet etmeyip ve sahib-i arzuhâl merkūm her vechile muhtâr-ı cemâ‘at ve erbâb-ı istihkākdandır deyü haber vermeleriyle imâmet-i mezkûre vazîfe-i mersûmeleriyle müteveffâ-yı merkūmun mahlûlünden sulbî oğlu merkūm Ömer Efendi’nin adem-i rağbetinden lede’l-imtihân istihkākı zâhir olan sahib-i arzuhâl merkūm es-Seyyid Ali b. es-Seyyid Salih dâ‘îlerine tevcîh ve yedine berat-ı şerîf-i âlîşân sadaka ve ihsân buyurulması husûsu re’y-i sâmîlerine menût idiği huzûr-ı sâmîlerine [19a] i‘lâm olundu.
Fî 12 S sene [1]249
|