Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 153 Hüküm no: 179 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tacir Ahmed Ağa’nın Yani’deki alacağına Dimitri’nin kefîl olduğu 148 guruşa sulh Ma‘rûz Derûn-ı arzuhâlde mezkûrü’l-ism Tâcir Ahmed Ağa b. Ali nâm kimesne İstanbul Bâb Mahkemesi’nde meclis-i şer‘-i hatîrde kezâlik derûn-ı arzuhâlde ismi mezkûr Yani v. Dimitri zimmî muvâcehesinde arzuhâl eden Dimitri v. Nikola zimmî hâzır olduğu hâlde benim mesfûr Yani zimmî zimmetinde cihet-i havâle-i sahîhadan bin iki yüz kırk sekiz guruş alacak hakkım olmağla meblağ-ı mezkûru mesfûr Yani zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mesfûr Yani zimmî ile bi’t-tav‘ ve’r-rızâ altı yüz kırk sekiz guruş üzerine sulh oldu<>ğumda ol dahi sulh-ı mezkûru kabûl ve bedel-i sulh-ı mezkûru mesfûr Yani zimmî çend rûz zarfında edâya ba‘de’t-ta‘ahhüd hâzır-ı mersûm Dimitri zimmî dahi meblağ-ı mezkûr altı yüz kırk sekiz guruşa tarafeynden bi’l-emr ve’l-kabûl kefâlet-i mutlaka-i sahîha ile kefîl ve dâmin olduğundan sonra bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika da‘vâdan mesfûr Yani zimmînin zimmetini kabûlü hâvî ibrâ ve iskāt eyledim deyü mukırr-ı mezbûr Ahmed Ağa’nın bi’l-cümle takrîr-i meşrûhunu mesfûr Yani zimmî ile hâzır-ı mersûm Dimitri zimmîden her birinin tasdîk eyledikleri huzûr[-ı âlîlerine i‘lâm olundu] Fî 22 Ramazan sene [12]55