Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 157 Hüküm no: 186 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Toros v. Artin’in borcunu ödemesi 300 guruş hüküm Ma‘rûz Medîne-i Erzurum sancağına muzâfe Kemah kasabası kurâlarından Delişerif karyesinde sâkin iken bundan akdem vefât eden es-Seyyid Ömer nâm kimesnenin verâseti zevce-i menkûha-i metrûkesi Hadice bt. Ahmed ile babası es-Seyyid Ahmed b. es-Seyyid Ali ve sulbiye kebîre kızları Şemsiye ve Hanife hatunlara münhasıra olduğu lede’ş-şer‘i’l-enver zâhir ve nümâyân oldukdan sonra verese-i merkūmûndan olup kendi nefsinden asıl ve zevce-i mezbûre Hadice ve bintân-ı mezbûretân Şemsiye ve Hanife hatunlar taraflarından husûs-ı âti’l-beyânda vekîl olduğu zâtları ârifân es-Seyyid Ali b. es-Seyyid Veliyyüddin ve Ahmed b. Osman nâm kimesneler şehâdetleriyle ber-nehc-i şer‘î sâbit olan sâhib-i arzuhâl merkūm es-Seyyid Ahmed nâm kimesne İstanbul Bâb Mahkemesi’nde meclis-i şer’de derûn-ı arzuhâlde mezkûrü’l-ism Toros v. Artin nâm zimmî muvâcehesinde mûrisimiz müteveffâ-yı mezbûrun mersûm Toros zimmî zimmetinde cihet-i karzdan bâ-temessük üç yüz guruş alacak hakkı olup meblağ-ı mezkûru kable’l-ahz ve’l-istîfâ fevt ve meblağ-ı mezbûr [24b] benimle müvekkilelerim mezbûrâta mevrûs olmağla meblağ-ı mezkûru mersûm Toros zimmîden bi’l-verâse ve bi’l-vekâle hâlâ taleb ederim deyü ba‘de’d-da‘vâ ve’l-ikrâr mûcebince <> asıl ve müvekkilât-ı mezbûrûna meblağ-ı mezkûr üç yüz guruşun edâsıyla mersûm Toros zimmî ilzâm olunduğu huzûr[-ı âlîlerine i‘lâm olundu] Fî 25 Şa‘bân sene [12]55