Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 158 Hüküm no: 188 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hanım’ın kocasından muhalaa yoluyla boşandığı Muhâla‘a Ma‘rûz İstanbul’da Eğrikapı kurbünde el-Hâc İlyas mahallesinde sâkine mu’arrefetü’z-zât Şerife Fâtıma bt. İsmail nâm hatun İstanbul Bâb Mahkemesi’nde meclis-i şer’de zevc-i muhâlı‘ı es-Seyyid Mehmed b. es-Seyyid Ali nâm kimesne muvâcehesinde mezbûr es-Seyyid Mehmed iki yüz guruş mehr-i müeccel tesmiyesiyle zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mehr-i müeccel-i mezkûrum olan iki yüz guruş ile nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyyete ve ibtidâ-i zevciyyetden işbu târîhe gelince sâir cemî‘ hukūk-ı şer‘iyeye müte‘allika âmme-i <> da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri mübâşirleri Bâb-ı Seraskerî kavaslarından Yüzbaşı İsmail Kavas kulları yediyle huzûr[-ı âlîlerine i‘lâm olundu] Fî 9 Şevvâl sene [12]55