Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 159 Hüküm no: 189 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Halil’in boşandığı hanımı Saide’ye olan borcunu ödemesi Tatlîk Ma‘rûz İstanbul’da Eskialipaşa kurbünde Hüsrevpaşa mahallesinde sâkine mu’arrefetü’z-zât Şerife Saide bt. es-Seyyid Mehmed nâm hatun İstanbul Bâb Mahkemesi’nde meclis-i şer’de zevc-i mutallıkı Mustafa b. el-Hâc Halil nâm kimesne muvâcehesinde mezbûr Mustafa Ağa yüz on bir guruş mehr-i müeccel <> tesmiyesiyle zevc-i dâhilim iken târîh-i i‘lâmdan on iki gün mukaddem beni tatlîk etmekle mezbûrun zimmetinde mehr-i müeccel-i mezkûrum olan yüz on bir guruşun elli guruşunu benim zevcim mezbûr zimmetinde cihet-i karzdan deynim olan elli guruşa takās ve mahsûb olunup bâkīsi olan yüz guruşu hâlâ bana edâya ve iddetim inkızâsına değin beni infâka zevcim mezbûra tenbîh olunmak matlûbumdur [deyü] da‘vâ ettikde ol dahi cevâbında müdde‘iyye-i mezbûre ol mikdâr guruş tesmiyesiyle zevce-i menkûha-i medhûlün-bihâsı olduğunu ve ber-vech-i muharrer tatlîkini ikrâr [ü] i‘tirâf etmeğin mûcebince mehr-i müeccel-i mezkûrdan bâkī yüz guruşu hâlâ ve nafaka-i iddet-i bakiye-i ma‘lûme ve me’ûnet-i süknâsı mukābelelerinde bi’t-terâzî beynlerinde ta‘yîn olunan yüz elli bir guruşu dahi hîn-i <> istihkākda zevcesi müdde‘iyye-i mezbûre Şerife Saide Hatun’a edâya mezbûr Mustafa Ağa’ya tenbîh olunduğu huzûr[-ı âlîlerine i‘lâm olundu] Fî 8 Şevvâl sene 1255