Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 36 Hüküm no: 7 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hekimhanlı Hamza Beşe’nin su kuyusuna düşüp boğularak öldüğü Medîne-i Üsküdar’a muzâfe Adalar nâhiyesine tâbi‘ Kartal kasabasında mütemekkin işbu râfi‘ü’r-rakīm Agop v. Kamrid zimmî meclis-i şer‘-i hatîrde takrîr-i kelâm ve ta‘bîr-ani’l-merâm edüp yine kasaba-i mezbûrede vâki‘ ve mutavattın Hamamcıoğlu Aci Kevork v. Bedros zimmînin yedinde mülkü olup arz-ı mîrî ze‘âmet toprağında Savak nâm mevzi‘de kâ’in taht-ı icâremde olan soğan bostanında ücret-i ma‘lûme ile hizmetimde istihdâm olan fi’l-asl vilâyet-i Anadolu’da vâki‘ Hekimhanı’nın ahâlîsinden Hamza Beşe b. Abdullah nâm kimesne târîh-i kitâb günü vaktü’z-zuhr zikr olunan bostanın kuyusundan mu‘tâd üzere su çeker iken bi-emrillâhi te‘âlâ Asta ta‘bîr olunur draht ucunda gerdel kovası basamak ağacına isâbet ve şikest olup ve mezbûr Hamza Beşe düşüp mezkûr kuyuda gark ve fevt olmağla taraf-ı şer‘den üzerine varılıp keşf ü tahrîr olunmak matlûbumdur dedikde kıbel-i şer‘den Mevlânâ Ahmed Efendi b. Hasan irsâl olunup ol dahi zeyl-i vesîkada muharrerü’l-esâmi Müslimîn ile mahâll-i mezkûra varup mağrûk-ı mezbûrun cesedi mezkûr kuyudan ba‘de’l-ihrâc nazar olundukda eser-i cerhden ve hankdan nesnesi olmayup hâl minvâl-ı muharrer üzere garîkan fevt olduğu ba‘de’l-mu‘âyene ve’l-müşâhede mevlânâ-yı mezbûr mahâllinde ketb ü keşf ve tahrîr ba‘dehû ba‘s olunan es-Seyyid Eyüb b. es-Seyyid Hasan ile meclis-i şer‘a gelüp alâ-vukū‘ıhî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-şehri Zilhicceti’ş-şerîfe li-sene seb‘a ve sittîn ve mi’ete ve elf. [Şuhûdü’l-hâl:] Abdullah b. Abdülkerim, Hüddâm-ı Ahmed Ağa, es-Seyyid Hüseyin b. es-Seyyid Hüseyin, İmam Ömer Efendi b. Mustafa, Kayseriyeli Mehmed Ağa b. Halil, Serdâr Mehmed Ağa b. Ali, Sarı Ali b. Ahmed, Korucu Osman Beşe.