.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 106
Hüküm no: 84
Orijinal metin no: [19a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Sefer Paşa Türbesi’nde ve Turhal’daki Kuruçay ve Akçafener-i Kalecik Mezraası Vakfı tevliyeti ile türbehanlık vazifelerinin Ali’nin vefatıyla İbrahim b. Ahmed’e verilmesi

Ma‘rûz,

Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da medîne-i Tokat’da Sefer Paşa türbesinde, Turhal kazâsında vâki‘ Kuruçay ve karye-i Akçafener-i Kalecik Mezra‘ası Vakfı’nın vazîfe-i mu‘ayyene ile düşenbe ve pençşenbe günlerinde tilâvet-i Kur’ân-ı azîmü’ş-şân etmek şartıyla tevliyetine ve türbehânlık cihetlerine mutasarrıf olan Ali bilâ-veled fevt olup yeri hâlî kaldığından bahisle sahib-i arzuhâl İbrahim b. Ahmed nâm kimesneye tevcîh ve yedine berat-ı âlîşân inâyet istid‘â eder, fi’l-hakīka ciheteyn-i mezkûreteyn merkūm Ali’nin üzerinde olduğu Anadolu Muhâsebesi derkenârından müstebân ve merkūm Ali’nin bilâ-veled fevti vâki‘ sahib-i arzuhâl İbrahim b. Ahmed’in erbâb-ı istihkākdan idiğini kazâ-i mezbûr ahâlîsinden Dersa‘âdet’de müsâfireten sâkinler es-Seyyid Mustafa b. Ali ve es-Seyyid Abdullah b. Ömer nâm kimesnelerin alâ-tarîkı’ş-şehâde ihbâr etmeleriyle zâhir ve mütehakkık olmağın bu sûretde ciheteyn-i mezkûreteyn müteveffâ-yı merkūmun bilâ-veled mahlûlünden sahib-i arzuhâl İbrahim b. Ahmed dâ‘îlerine tevcîh ve yedine berat-ı âlîşân sadaka ve ihsân buyurulmak husûsu re’y-i sâmîlerine menût idiği huzûr-ı âlîlerine i‘lâm olundu. Bâkī emr u fermân hazret-i men-lehu’l-emrindir.

Fî S sene [12]49