Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 161 Hüküm no: 192 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirhor v. Ohannes’in borcunu ödemesi 600 guruşa hüküm Ma‘rûz Terzi tâifesinden Mihal v. Andon nâm zimmî İstanbul Bâb Mahkemesi’nde meclis-i şer‘-i münîrde Kirhor v. Ohannes nâm zimmî muvâcehesinde mersûm Kirhor zimmî zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği altı yüz guruş alacak hakkım olup hattâ <> meblağ-ı mezkûru zimmetinde bana deyni olduğunu mersûm Kirhor zimmî ikrâr <> ve işbu sene-i mübâreke şehri Ramazani’l-mübâreki gurresi târîhiyle müverrah bir kıt‘a temessüğü dahi yedime i‘tâ etmekle meblağ-ı mezkûr altı yüz guruşu mesfûr Kirhor zimmîden hâlâ taleb ederim deyü da‘vâ ettikde ol dahi cevâbında benim müdde‘î-i mersûm Mihal zimmîye kat‘â zimmetimde deynim yoğiken meblağ-ı mezkûr altı yüz guruşu mükâziben ikrâr ve temessük-i mezkûru yedine vermişidim deyücek mersûm Kirhor zimmî ikrârında kâzib olmayıp ve müdde‘î-i mersûm da‘vâ-yı mezkûresinde mubtıl olmadığına bi’t-taleb mersûm Mihal zimmîye <> bi’l-muvâcehe ber-nehc-i şer‘î yemîn verilmeğin mûcebince meblağ-ı mezkûr altı yüz guruşun müdde‘î-i mesfûr Mihal zimmîye edâsıyla mersûm Kirhor zimmî ilzâm olunduğu mübâşirleri Bâb-ı Seraskerî kavaslarından Mustafa Kavas kulları yediyle huzûr[-ı âlîlerine i‘lâm olundu] Fî 7 Ramazan sene [12]55