Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 162 Hüküm no: 195 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ümmügülsüm Hanım’ın boşandığı kocası ile her konuda anlaştığı Tatlîk Ma‘rûz İstanbul’da Lütfüpaşa kurbünde Defterdâr Ahmed Çelebi mahallesinde sâkine sâhibe-i arzuhâl mu’arrefetü’z-zât Şerife Ümmügülsüm bt. es-Seyyid İbrahim nâm hatun İstanbul Bâb Mahkemesi’nde meclis-i şer‘-i münîrde zevc-i mutallıkı derûn-ı arzuhâlde mezkûrü’l-ism es-Seyyid Mehmed Nuri Ağa b. es-Seyyid Mustafa nâm kimesne muvâcehesinde mezbûr es-Seyyid Mehmed Nuri Ağa <> yüz otuz [üç yüz] bir guruş mehr-i müeccel tesmiyesiyle zevc-i dâhilim olup işbu târîh-i i‘lâm günü beni tatlîk etmekle mezbûrun zimmetinde mehr-i müeccel-i mezkûrum olan üç yüz bir guruş ile nafaka-i aded-i [iddet-i] mu‘ayyene-i ma‘lûmem ve me’ûnet-i süknâm mukābelelerinde bi’t-terâzî beynimizde ta‘yîn olan [olunan] yüz elli guruş ki cem‘an dört yüz elli guruşu zevcim mezbûr es-Seyyid Mehmed Nuri Ağa işbu meclis-i şer’de bana def‘ ü teslîm ben dahi yedinden tamâmen ve kâmilen ahz u kabz edip hukūk-ı zevciyyete ve ibtidâ-i zevciyyetden işbu târîh-i i‘lâma gelince sâir beynimizde cereyân eden cemî‘ hukūk-ı şer‘iyeye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri huzûr[-ı âlîlerine i‘lâm olundu] Fî 10 Şevvâl sene [12]55