Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 163 Hüküm no: 196 Orijinal metin no: [25b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aznavur v. Kirkor’un emanet aldığı enfiye kutusunu sahibine iade etmesi Enfiye kutusunu teslîme tenbîh Ma‘rûz İstanbul’da Sofular mahallesinde sâkine sâhibe-i arzuhâl Zeyneb Hanım bt. Abdullah b. Abdülmennan tarafından husûs-ı âti’l-beyânda vekîl olduğu zâtını ârifân Amasyalı Ali Ağa b. Yusuf ve taşralı Ali Ağa b. Ömer nâm kimesneler şehâdetleriyle sâbit olan Kılıç Ali Paşa Câmi‘-i şerîfi İmâmı Hafız Ali Efendi b. Mehmed meclis-i şer‘-i münîrde kuyumcu tâifesinden derûn-ı arzuhâlde ismi mastûr Aznavur v. Kirkor nâm zimmî muvâcehesinde işbu târîh-i i‘lâmdan iki sene mukaddem müvekkilem merkūme Zeyneb Hanım mâlından on iki bin guruş kıymetli üzeri elmaslı bir aded minalı altın enfiye kutusunu âhara bey‘ edivermek üzere mersûm Aznavur zimmî yedine teslîm etmekle kutu-yı mezkûr mersûm Aznavur zimmî yedinde mevcûde olmağla müvekkilem merkūmeye teslîm etmek üzere mersûm Aznavur zimmîye tenbîh olunmak bi’l-vekâle murâdımdır deyü da‘vâ ettikde ol dahi cevâbında zikr olunan kutuyu gāib-i ani’l-meclis tüccârdan Mıgırdıç nâm zimmî yedine îdâ‘ ve teslîm etmemle kutu-yı mezkûr gāib-i mersûm Mıgırdıç zimmînin yedinde mevcûddur deyü müdde‘î-i vekîl-i merkūm Hafız Ali Efendi’nin ber-minvâl-i muharrer müdde‘âsını tâyi‘an ve kat‘iyyen ikrâr ü i‘tirâf etmeğin mûcebince kutu-yı mezkûru gāib-i mersûm Mıgırdıç zimmîden ahz ve müvekkile-i merkūme Zeyneb Hanım’a teslîm etmek üzere mersûm Aznavur zimmîye tenbîh olunduğu İstanbul Mahkemesi’nden huzûr[-ı âlîlerine i‘lâm olundu] Fî 10 Şevvâl sene [1]255