.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 107
Hüküm no: 85
Orijinal metin no: [19a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Develi kazası Ebekler mahallesi mescidi imamı Mehmed Ali b. Mehmed’in vefatıyla yerine Seyyid Mustafa Halîfe b. Ömer’in tayini

Ma‘rûz,

Sâdır olan fermân-ı âlîlerine imtisâlen işbu istid‘â ve derkenâra nazar olundukda Anadolu’da Develi kazâsı mahallâtından Ebekler mahallesinde vâki‘ mescid-i şerîfde vazîfe-i mu‘ayyene ile imâm olan Mehmed Ali b. Mehmed bilâ-veled fevt olup yeri hâlî ve hizmet-i lâzımesi mu‘attal kaldığından imâmet-i mezkûre müteveffâ-yı mezbûrun bilâ-veled mahlûlünden vücûhla ehliyet ve liyâkat ve istihkākı lede’l-imtihân nümâyân olan sahib-i arzuhâl es-Seyyid Mustafa Halîfe b. Ömer’e bi’n-nefs varıp mescid-i mezbûrda imâmet etmek ve bedel ile kasr-ı yedine i‘tibâr olunmayıp hizmet-i lâzımesinde tekâsül eder ise ref‘inden âhara tevcîh olunmak şartıyla bin iki yüz kırk sekiz senesi Receb’inin yedinci günü tevcîh ve berat olundukdan sonra es-Seyyid Mehmed b. İbrahim kazâ-i mezbûr nâibi Mustafa Efendi’den aldığı bir kıt‘a arz ile Der-aliyye’ye gelip merkūm es-Seyyid Mustafa şart-ı mezkûra ri‘âyet etmeyip hizmet-i mezkûresi mu‘attal kaldığından imâmet-i mezkûre merkūm Mustafa’nın ref‘inden kendüye tevcîhini istid‘â ve merkūm es-Seyyid Mustafa’nın gıyâbında üzerinden ref‘le sene-i mezbûre Zilka‘desi gurresinde kendüye tevcîh ve berat ettirdiği derkenârdan müstebân ve mezbûr es-Seyyid Mustafa bu def‘a zuhûra gelip benim hizmet-i celîle-i mezkûreyi edâda kusûrum yoğiken merkūm es-Seyyid Mehmed gıyâbımda bir-takrîb üzerimden ref‘le kendüye tevcîh ettirdiği imâmet-i mezkûre mezbûrun ref‘inden sahib-i evvel olduğuma binâen bana tevcîh olunup yedime berat-ı âlîşân i‘tâ olunsun deyü işbu arzuhâliyle istid‘â ve kazâ-i mezbûr ahâlîsinden Der-aliyye’de müsâfireten sâkinler ( ) nâm kimesnelerden istihbâr olundukda işbu merkūm es-Seyyid Mustafa tahsîl-i ulûm-ı nâfi‘a için şimdilik Der-aliyye’de sâkin ise de tarafından tevkîl eylediği pederi kazâ-i mezbûrda sâkin mezbûr es-Seyyid Ömer imâmet-i mezkûre hizmetini bi’l-vekâle edâda kat‘â tekâsülü yokdur deyü herbiri alâ-tarîkı’ş-şehâde haber vermeleriyle haberleri mûcebince bâbü’l-vekâle meftûh iken bi’n-nefs edâ-i hizmet eyle deyü merkūm es-Seyyid Mustafa’yı ta‘allüm-i ulûm-ı nâfi‘adan ahâlînin men‘leri meşrû‘ olmamağla bu sûretde imâmet-i mezkûre mezbûr es-Seyyid Mehmed’in ref‘inden tevcîh sebkat eden sahib-i evvel-i mezbûr es-Seyyid Mustafa’ya tevcîh ve tekmîl-i nesh edip kazâ-i mezbûra varıncaya kadar tarafından vekâleten edâ-i hizmet etdirmek üzere yedine berat-ı şerîf-i âlîşân inâyet ve ihsân buyurulmak husûsu re’y-i âlîlerine menût mevâddan idiği huzûr-ı âlîlerine i‘lâm olundu. Bâkī emr u fermân hazret-i men-lehu’l-emrindir.

Fî 15 S sene [1]249