Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 170 Hüküm no: 208 Orijinal metin no: [27a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Praşkova v. Todori’nin borcunu ödemesi Ma‘rûz İsmail Ağa b. Mustafa nâm kimesne İstanbul Bâb Mahkemesi’nde meclis-i şer’de Praşkova v. Todori nâm zimmî muvâcehesinde mesfûr Praşkova zimmî zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği sekiz yüz elli guruş alacak hakkım olmağla meblağ-ı mezkûru mesfûr Praşkova zimmîden hâlâ taleb ederim deyü tasaddî eylediğim da‘vâ-yı mezkûremden bâ-tavassut-ı muslihîn zimmî-i mesfûr ile bi’t-tav‘ ve’r-rızâ beş yüz elli guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledim [eyledik] deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr beş yüz elli guruşu müdde‘î-i merkūm İsmail Ağa’ya edâsıyla mesfûr Praşkova zimmî ilzâm olunduğu mübâşirleri Bâb-ı Seraskerî [kavaslarından] Mehmed Kavas [kulları yediyle huzûr-ı âlîlerine i‘lâm olundu] Fî 15 Şevvâl sene [12]55