.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 108
Hüküm no: 86
Orijinal metin no: [19a-3]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Yedidivan kazasındaki vakıf mezraa mutasarrıflarından vefat edenlerin hisselerinin evlad-ı vakıfdan olanlara verilmesi

Ma‘rûz,

Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Yedidivan kazasında Gedos dîvânında Ümmet çiftliği İskender Bey Vakfı olan beş müdlük yer evlâdiyet ve meşrûtiyet üzere ber-mûceb-i şart-ı vâkıf öşr-i mahsûliye mutasarrıfı İbrahim ve yine kazâ-i mezbûr[a] tâbi‘ Germus Şeyh Yusuf mezrâ‘asına mutasarrıfı Feyzullah b. Mehmed ve yine kazâ-i mezbûrda Küçük Gedos nâm karyede evlâ[d]-ı evlâda meşrûta İlyas Vakfiyesi mezrâ‘ası vakfının evlâddan olanlara ale’s-seviye mutasarrıf olalar deyü şart ve ta‘yîn eylediğinden ber-mûceb-i şart-ı vâkıf iştirâken mutasarrıfları Mehmed ve Kezban ve yine kazâ-i mezbûra tâbi‘ Germus karyesinde Hacı Vakfiyemezrâ‘ası demekle ma‘rûf mezrâ‘anın mutasarrıfları eş-Şeyh Osman ve Şeyh Ahmed ve yine kazâ-i mezbûrda Germus nâm karyede Hacı Vakfiye mezrâ‘asına ve Danişmendi karyesinde Şeyh Yusuf mezrâ‘asına Ahmed mutasarrıfı müte‘âkıben merkūmûn fevt olup yeri hâlî ve hizmet-i lâzımesi mu‘attal kaldığından bahisle müteveffâ-yı merkūmûnun mahlûllerinden kendüye tevcîh ve yedine berat-ı şerîf-i âlîşân i‘tâ olunmasını sahib-i arzuhâller Şerife Emine ve Şerife Fâtıma hatunlar işbu arzuhâl ile istid‘â ederler, fi’l-hakīka merkūmûnun başka başka beratıyla üzerlerinde olduğu derkenârdan müstebân ise de merkūmûnun bilâ-veled fevt oldukları tahkīk ve tahrîr için kazâ-i mezbûr ahâlîlerinden Der-aliyye’de müsâfireten sâkinler Halil b. Osman, Mustafa b. Osman nâm kimesnelere suâl olundukda sahibe-i arzuhâlin evlâd-ı vâkıfdan olduklarını alâ-tarîkı’ş-şehâde haber vermeleriyle evlâd-ı vâkıfdan oldukları zâhir ve nümâyân olmuş ise de husûs-ı mezbûru bu tarafda gereği gibi tahkīk olunur mevâddan olmamağla ancak mahâllinde bilâ-berât mutasarrıf olan mutasarrıfları ammisi Ali ve Mustafa ile sahibe-i arzuhâl Şerife Fâtıma ve Şerife Emine nâm hatunlar ile âbâ ve ecdâdları zikrolunarak mahâllinde bâbında? kazâ-i mezkûrun ser-livâsı olan Bolu kazâsı hâkimine hitâben bir kıt‘a fermân-ı celîlü’ş-şân ısdârı ber-nehc-i şer‘-i şerîf mürâfa‘a olup her vechile hükm-i şer‘-i şerîf lâhık olur ise ona göre iktizâsına bakılmak için keyfiyet mürâfa‘a ve sûret-i hükm-i şer‘îyi alâ vechi’s-sıhha der-bâr-ı şevket-karâra arz ve i‘lâma mübâderet eylemiş ısdârı muvâfık irâde-i seniyyeleri olur ise ol bâbda ve her zaman her hâlde emr u fermân hazret-i veliyyü’l-emrindir.