Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 173 Hüküm no: 213 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın hanımını döverek çocuk düşürmesine sebep olan Şerife Fâtıma Hanım aleyhine açtığı davadan vazgeçtiği Cenîn-i meyyit da‘vâsından ibrâ, kabûl Ma‘rûz İstanbul’da Aksaray kurbünde Alembey mahallesinde sâkine kendi nefsinden asıl ve zevcesi Şerife Hadice bt. es-Seyyid Hüseyin nâm hatun tarafından husûs-ı âti’l-beyânda vekîl olduğu zât-ı mezbûreyi ârifân İbrahim Ağa b. Derviş Mehmed ve es-Seyyid Mehmed Ağa b. el-Hâc Mustafa nâm kimesneler şehâdetleriyle ber-nehc-i şer‘î sâbit olan sâhib-i arzuhâl Mehmed Ağa b. Abdullah İstanbul Bâb Mahkemesi’nde meclis-i şer‘-i münîrde derûn-ı arzuhâlde mezkûretü’l-ism zâtı mu‘arrefe Şerife Fâtıma bt. Abdullah nâm hatunun zevci ve tarafından husûs-ı âti’l-beyânda tasdîka vekîl-i müseccel-i şer‘îsi Mehmed Sadık Ağa b. Hasan nâm kimesne muvâcehesinde müvekkile-i mezbûrenin menziline gelip zevcem müvekkile-i mezbûreyi bi-gayri hak darb ve darbından nâşî benim firâşımdan hâsıl ve zevcem müvekkilem mezbûrenin batnında mevcûde hamli olmağla haml-i mezkûr müstebînü’l-hılka bir cenîn-i meyyit ilkā etmekle mûcib-i şer‘îsini bi’l-asâle ve bi’l-vekâle taleb ederim deyü tasaddî eylediğim da‘vâmdan rızâmla meccânen fâriğ olmamla bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini bi’l-asâle ve bi’l-vekâle ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri huzûr[-ı âlîlerine i‘lâm olundu] Fî 6 Şevvâl sene [12]55