Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 174 Hüküm no: 216 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğinli Ohannes ile Karabet v. Manuk arasındaki alacak-verecek davasında karar verilmediği Mazbata kaydı Ma‘rûz Tütüncü tâifesinden derûn-ı arzuhâlde mastûrü’l-ism Eğinli Ohannes v. Kivork nâm zimmî İstanbul Bâb Mahkemesi’nde meclis-i şer‘-i münîrde tâife-i merkūmeden sâhib-i arzuhâl Karabet v. Manuk nâm zimmî muvâcehesinde ben bir müddetden beri mersûm Karabet zimmîye mâlımdan bey‘ ü teslîm eylediğim ma‘lûmü’l-vezn ve’l-fiyat duhânın hesâbını sene-i sâbıkā Ramzânü’l-mübârekinin üçüncü günü İstanbul’da Mercan kurbünde Yeni Han derûnunda kâin Sarrâf İstefan zimmînin odasında mesfûr Karabet zimmî ile rü’yet eylediğimizde benim mersûmun zimmetinde semen-i mezkûrdan beş bin yedi yüz altmış yedi guruş alacak hakkım zuhûr ve meblağ-ı mezkûr zimmetinde bana deyni olduğunu zimmî-i mersûm ikrâr edip ba‘dehu mersûm Karabet zimmî tekrâr bâ-defter-i müfredât mâlımdan ve yedimden iştirâ ve kabz eylediği kezâlik ma‘lûmü’l-vezn ve’l-fiyat duhân semeninden beş bin iki yüz otuz <> buçuk guruş ki cem‘an on bir bin altı buçuk guruş alacak hakkımın üç bin beş yüz yetmiş iki guruşunu ceste ceste kendi yediyle nakden bana edâ ve teslîm ve iki yüz altmış guruşunu dahi emrimle dükkân kirâsına ve kırk beş guruşunu kezâlik emrimle âhardan iştirâ eylediği perde semenine verdikden sonra mesfûr Karabet zimmî işbu sene-i mübâreke Cumâdelâhiresi’nin on beşinci günü talebiyle tütüncü esnâfı lonca ihtiyârları hâzır olduğu hâlde dükkânında mevcûd bi’l-cümle emvâlini tahrîr birle yedinde olan ma‘lûmü’l-vezn ve’l-fiyat duhânını beş bin dokuz guruşa ve kezâlik ma‘lûmü’l-vakıyye şekerini iki yüz üç buçuk guruşa bâyi‘im gāib ani’l-beled İstefan zimmî ile bana bey‘ ü temlîk ve teslîm eylediğinde ben dahi iştirâ ve kabz ve ol vechile min-haysü’l-mecmû‘ dokuz bin iki yüz buçuk guruşunu mersûm Karabet zimmîden ahz ü istîfâ etmemle bâkīsi olan bin sekiz yüz altı guruşu mesfûr Karabet zimmîden hâlâ taleb ederim deyü da‘vâ ettikde ol dahi cevâbında müdde‘î-i mersûm Ohannes zimmî ile Han-ı mezkûrda hesâblarımızı rü’yet eylediğimiz hînde zimmî-i mersûmun alacağı olup zimmetimde zuhûr eden iki bin üç yüz otuz altı guruş ve ba‘dehu tekrâr mâlından iştirâ eylediğim duhân semeninden beş bin iki yüz otuz dokuz buçuk guruş ki cem‘an yedi bin beş yüz yetmiş beş buçuk guruş deynim olup meblağ-ı mecmû‘-ı merkūmun üç bin beş yüz yetmiş iki guruş müdde‘î-i mersûmun kabzını mu‘terif olduğu üzere ve bin dört yüz elli guruşunu dahi yine müdde‘î-i mersûma ceste ceste edâ ve teslîm ve ol vechile cem‘an beş bin yirmi iki guruşunu îfâ edip bâkī zimmetimde müdde‘î-i mesfûra iki bin beş yüz <> elli üç buçuk guruş deynim kalmış iken müdde‘î-i mesfûr Ohann[es] zimmî zikr olan Cumâdelâhiresi’nin on beşinci günü Beylerbeyi nâm mahâlde vâki’ mütemekkin olduğum dükkânıma bâyi‘-i gāib-i mersûm İstefan zimmî irsâl birle dükkânımda mevcûd mâlımdan mecmû‘u tahmînen on bir bin beş yüz on altı guruş kıymetli duhân ve tömbeki ve attâriyemi benim kat‘an haber ve âgâhım yoğiken fuzûlî ahz <> ve istihlâk etmekle eşyâ-i mezkûrenin ber-vech-i muharrer kıymetleri olan meblağ-ı mezkûr on bir bin beş yüz on altı guruşun iki bin beş yüz elli üç buçuk guruşu <> zimmetimde bâkī deynim olan iki bin beş yüz elli üç buçuk guruşa takās ve mahsûb olunup mâ‘adâsı olan sekiz bin dokuz yüz altmış iki buçuk guruşu mersûm Ohannes zimmîden tazmîn taleb ederim deyüp lâkin mersûm Karabet zimmî dükkân-ı mezkûr derûnunda olan emvâl ne mikdâr olduğunu tashîhe havâle <> ve istikşâf-ı hâl içün ehl-i vukūfun dahi meclis-i mürâfa‘ada bulunması her birine ifâde ve def‘-i meclis bulunup tarafeyn bir daha meclis-i şer‘a gelmemeleriyle henüz da‘vâlarına faysal verilmediği imtisâlen-li’l-emri’l-âlî sûret-i zabtı huzûr[-ı âlîlerine i‘lâm olundu] Fî 10 Şevvâl sene [12]55