Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 176 Hüküm no: 218 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lamer v. Dimitri’nin alacaklısı tarafından tecil edilen borcunu ödemesi Te’cîl i‘lâmı Ma‘rûz Sâhib-i arzuhâl Francalacı İlya v. Nikola nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde mastûrü’l-ism Lambro v. Dimitri nâm zimmî muvâcehesinde mersûm Lambro zimmî zimmetinde yedimde olup bin iki yüz otuz altı senesinde duhûl eden Mayısı’nın üçüncü günü târîhiyle müverrah Rûmiyyü’l-imlâ bir kıt‘a temessük mantûkunca mâlımdan ve yedimden iştirâ ve kabz eylediği ma‘lûmü’l-vezn ve’l-fiyat francala semeninden bin üç yüz altmış guruş alacak hakkımın ancak altı yüz on guruş mütâlebesine müte‘allika da‘vâdan mersûm Lambro zimmînin zimmetini kabûlü hâvî ibrâ ve iskāt edip bâkīsi olan yedi yüz elli guruşu dahi zimmî-i mersûmun hâlâ def‘aten edâya iktidârı olmayıp ber-vech-i âtî te’cîle tâlib olduğundan ben dahi meblağ-ı mezkûr yedi yüz elli guruşun iki yüz guruşunu târîh-i i‘lâmdan beş gün mürûrunda ve mâ‘adâ beş yüz guruşu târîh-i mezkûrdan yüz yirmi gün mürûrunda tamâmen bana edâ ve îfâ etmek üzere rızâmla mersûmu te’cîl eyledim deyü mukırr-ı mersûmun bi’l-cümle takrîr-i meşrûhunu mesfûr Lambro zimmî tasdîk ve meblağ-ı bâkī-i mezkûru ber-vech-i muharrer müeccelen dâyini mersûm İlya zimmîye edâya müte‘ahhid olduğu huzûr[-ı âlîlerine i‘lâm olundu] Fî 6 Şevvâl sene [12]55