Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 177 Hüküm no: 219 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa’nın Hasan Reis aleyhine açtığı gemi eşya iadesi davasının geçersiz olduğu Sefine eşyâsına dâir Ma‘rûz Derûn-ı arzuhâlde mezkûrü’l-ism İsmail Ağa b. el-Hâc Ali nâm kimesne İstanbul Bâb Mahkemesi’nde meclis-i şer‘-i münîrde arzuhâl eden Hasan Reis b. el-Hâc Mehmed nâm kimesne muvâcehesinde işbu târîh-i i‘lâmdan bir sene mukaddem medîne-i Üsküdar’a muzâfe Kartal nâhiyesi civârında sâhil-i bahrde örf-i mellâhînde Çekdirme ta‘bîr olunur mâlik olduğum bir kıt‘a sefinem bi-kazâillâhi te‘âlâ karaya düşüp amel-mânde olup lâkin derûnunda mevcûd mâlından mecmû‘u üç bin beş yüz guruş kıymetli iki muşamma‘ ve dört çârıh [çark] ve sagīr ve kebîr üç aded yelken ve bir direk ve bir dümen ve yeke ve dört muşamma‘ demiri ve iki halat ve bir kebîr demir ve bir gâbya ve bir küfe mismârımı mezbûr Hüseyin [Hasan] Reis bi-gayri hak fuzûlî ahz u kabz edip ve hâlâ yedinde mevcûd olmağla eşyâ-i muharrere-i mezkûreyi bi-a‘yânihâ bana teslîme merkūm Hasan Reis’e tenbîh olunmak murâdımdır deyü da‘vâ ettikde ol dahi cevâbında ikrâr u i‘tirâf edip lâkin müdde‘î-i mezbûr İsmail Ağa eşyâ-i muharrere-i mezkûreyi bundan akdem sekiz yüz guruş semen tesmiyesiyle bana bey‘ u temlîk ve teslîm eyledi deyü eylediği def‘ini hâmiş-i arzuhâlde mastûr medîne-i mezkûre mahkemesinden verilen bir kıt‘a mazbata i‘lâmı nâtık olduğu üzere mezbûr İsmail Ağa ikrâr ü i‘tirâf etmekle mûcebince müdde‘î-i mezbûr İsmail Ağa da‘vâ-yı mezkûresiyle mezbûr Hasan Reis’e bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 26 Şevvâl sene [12]55