.:: İstanbul Kadı Sicilleri ::.


Anadolu Sadareti Mahkemesi 1 Numaralı Sicil (H. 1247-1250/ M. 1831-1834)
cilt: 93, sayfa: 109
Hüküm no: 87
Orijinal metin no: [19b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Erzurum’daki Derviş Ağa Vakfı’na ait musakkafât kiracılarının yaptıkları masrafları kiraya mahsup edemeyecekleri

Ma‘rûz,

Sâdır olan fermân-ı âlîlerine imtisâlen arzuhâl ve derkenâra ba‘de nazar bâ-hatt-ı hümâyûn ve bâ-mukābele-i nân kendüye ihsân-ı hümâyûn kılınan Erzurum’da kâin Derviş Ağa Vakfı’nın evkāf-ı sâire gibi kurâ ve arâzîye müte‘allık merbûtâtı olmayıp Erzurum’da Emti‘a ve Duhan Gümrükleri ve sâir hân ve hamam vâridâtından ibâret olduğundan cemî‘ evkāfda cârî ve mu‘teber mütevellîden izinsiz hâkim mürâselesiyle yâhûd sûret-i âharla birer takrîb ebniye ihdâsı ve ta‘mîrât ihdâsıyla vakf-ı mezbûrun müstehık olduğu icâreyi matlûblarına mahsûben zimmetlerinde ibkāen ve bu vechile sahibü’l-hayrın Erzurum’da vâki‘ câmi‘-i şerîf ve ondan mütecâviz çeşmelerin ta‘tîl ve harâbete bâdî ve kendisinin medâr-ı ma‘âşı olup gadr müstelzim olduğundan bahisle Anadolu Muhâsebesi’nden kaydı ihrâc ile vakf-ı mezbûrun müste’cirleri ve gerek gümrükçüleri bundan böyle musakkafât-ı mezbûra ebniye ihdâsı ve mesârif-i ta‘mîrât teberru‘an li’l-vakf olarak zimmetlerinde terâküm eden icârâta mahsûb olunmayıp bu bâbda da‘vâ ve mu‘ârazalarına bi’l-cihetle müsâ‘ade olunmayarak Erzurum vâlîsine ve hâkimine ve Emti‘a ve Duhan gümrükçülerine hitâben bir kıt‘a emr-i âlî sudûrunu sahib-i arzuhâl vakf-ı mezbûrun mütevellîsi Mehmed Naif dâ‘îleri istid‘â-yı inâyet eder, fi’l-hakīka vakf-ı mezbûrun tevliyeti bâ-mukābele-i nân mezbûrun üzerinde olduğu derkenârdan müstebân olmağın Zeyd bir vakıf dükkânın ta‘mîrine mütevellî emrinsiz kendi mâlından şu kadar akçe sarf edip meremmet-i müstehleke makūlesi meremmet eylese Zeyd vech-i muharrer üzere meremmet için mal-ı vakıfdan nesne almağa kādir olur mu, el-cevâb olmaz deyü mütevellî-i mezbûrun yedine i‘tâ kılınan bir kıt‘a fetvâ-yı şerîf mûcebince müste’cirlerin mütevellî emrinsiz meremmet-i müstehleke makūlesi meremmet-i vakıf için eyledikleri mesârifâtı mal-ı vakıfdan mutâlebeleri na-meşrû‘ ve yedlerinde olan icârâtlar dahi mahsûb olmayıp bu sûretde zimmetlerinde terâküm eden icârâtının min-gayri lecc vakf-ı mezbûr için taraf-ı vakıfdan icârâtı kabza me’mûr olan kimesneye edâları iktizâ etmekle husûs-ı mezbûr için bir kıt‘a emr-i âlî sudûru menût-ı re’y-i âlîleri idiği huzûr-ı âlîlerine i‘lâm olundu.

Fî S sene [12]49