Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 178 Hüküm no: 221 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Bretamos’un borcunu ödemesi 350 guruş hüküm Ma‘rûz Derûn-ı arzuhâlde mastûrü’l-ism Kir[ya]ko <> v. Lambo nâm zimmî İstanbul Bâb Mahkemesi’nde meclis-i şer‘-i hatîrde arzuhâl eden Yani v. Bretamos nâm zimmî muvâcehesinde mersûm Yani zimmî zimmetinde bundan akdem mâlımdan ve yedimden iştirâ ve kabz eylediği bâ-defter-i müfredât eşyâ-i ma‘lûme semeninden ba‘de külli’l-hesâb gayr-ı ez-teslîmât sahhu’l-bâkī bin guruş alacak hakkım olmağla meblağ-ı mezkûru mesfûr Yani zimmîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm Yani zimmî ile bi’t-tav‘ ve’r-rızâ üç yüz elli guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra <> ve hukūk-ı sâire-i şer‘iyeye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr üç yüz elli guruşun müdde‘î-i mersûm Kiryako zimmîye edâ ve teslîme mesfûr Yani zimmîye tenbîh olunduğu huzûr[-ı âlîlerine i‘lâm olundu] Fî 16 Şevvâl sene 1255