|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 109 Hüküm no: 88 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Şeyhlü kazası Kızılcasöğüd köyündeki Çorbacı Mustafa Ağa tarafından yaptırılan camiye imam tayini
Ma‘rûz,
Sâdır olan fermân-ı âlîlerine imtisâlen i‘lâm ve mahzar ve derkenâra ba‘de’n-nazar Şeyhlü kazâsına tâbi‘ Kızılcasöğüd nâm karyede vâki‘ ashâb-ı hayrâtdan Çorbacı Mustafa Ağa nâm sahibü’l-hayrın binâ eylediği câmi‘-i şerîfinde ber-vech-i hasbî imâmet cihetinin nısf hissesine Hâfız Mustafa b. Ebûbekir dâ‘îleri bâ-berat mutasarrıf olup hizmet-i lâzımesi[ni] edâda kusûru yoğiken bazı erbâb-ı garaz merkūm dâ‘îlerine nefsâniyet ederek hilâf-ı vâki‘ inhâ birle bir tarîkle nısf hisse imâmeti merkūm üzerinden ref‘ birle hissedârı İsmail üzerine tevcîh ve berat ettirmiş olmalarıyla merkūm Hâfız Mustafa dâ‘îleri hizmet-i mezkûra her vechile elyak ve ehak ve ehl-i Kur’ân olup mağdûr olduğu müderris-i karye ve cemâ‘atleri ihbâr eylediklerinden bahisle nısf imâmet hissedârı merkūm İsmail üzerinden ref‘ birle mutasarrıf-ı sâbıkı merkūm Hâfız Mustafa dâ‘îlerine tevcîh ve yedine müceddeden bir kıt‘a berat-ı şerîf-i âlîşân sadaka ve ihsân kılınması bâbında Şeyhlü kazâsı ahâlîsinin mümzâ ve mahtûm takdîm eyledikleri bir kıt‘a mahzarı musaddak hâlâ Şeyhlü kazâsı nâibi es-Seyyid Hüseyin Hulusi Efendi dâ‘îleri istid‘â-yı inâyet eder, fi’l-hakīka Şeyhlü kazâsında Kızılcasöğüd karyesinde Çorbacı Mustafa Ağa binâsı câmi‘-i şerîfinde ber-vech-i hasbî imâmet cihetinin nısf hissesine mutasarrıf olan Hüseyin b. Osman bilâ-veled fevt olup hisse-i mezbûreden müştereki dahi keff-i yedinden bâni’i Mustafa Efendi arzıyla 1245 senesi Ş ( ) Hâfız Mustafa b. Ebûbekir’e tevcîh ve berat olundukdan sonra câmi‘-i şerîf-i mezbûrun ber-vech-i hasbî imâmet cihetinin nısf hissesi Hâfız Mustafa b. Ebûbekir’in ve nısf-ı âharı İsmail b. Şeyh Osman’ın başka başka beratla üzerlerinde iken mezbûrândan merkūm Hâfız Mustafa’nın iktidâya münâfî sû-i hâli ve imâmet ehliyeti olmadığından mâ‘adâ azlini mûcib hâlât-ı kesîresi olup menfûr ve müstekreh-i cemâ‘at olduğu mahâllinde bazı kimesneler ihbâr ve inhâ eylediklerinden nısf hisse imâmet ciheti merkūm Hâfız Mustafa’nın üzerinden ref‘ birle muhtâr-ı cemâ‘atden nısf-ı âharına mutasarrıf olan es-Seyyid İsmail b. Osman’a tevcîh ve yedine berat-ı şerîf-i âlîşân i‘tâ kılınması bâbında kazâ-i mezbûr nâibi Osmanzâde es-Seyyid Halil Efendi’nin arzı ve ahâlînin dahi mahzar eylediklerinde husûs-ı mezbûrun keyfiyeti etrâfıyla tahkīk ve taharrî olunması husûsu selefimiz izzetlü fazîletlü Yahyazâde Mehmed Said Efendi hazretlerine lede’l-havâle kazâ-i mezbûr ahâlîlerinden Der-aliyye’de bulunan bazı kimesneler mezbûr Hâfız Mustafa’nın iktidâya münâfî sû-i hâlini ve menfûr ve müstekreh-i cemâ‘at olduğunu bi’l-ihbâr tahkīk ederek nısf imâmet-i mezbûre merkūm Hâfız Mustafa’nın üzerinden ref‘ birle nısf-ı âharına mutasarrıf olan mezbûr es-Seyyid İsmail’e tevcîh olunması iktizâ eylediğini efendi-yi müşârün-ileyh i‘lâm etmeleriyle i‘lâmları mûcebince tevcîh ve yedine fî 22 Ş sene 48 târihiyle müverrah yedine müceddeden berat-ı şerîf-i âlîşân sadaka ve ihsân olunup el-yevm imâmet-i mezbûre müstakillen mezbûr es-Seyyid İsmail b. Şeyh Osman’ın bâ-berat-ı âlî üzerinde olduğu derkenârdan müstebân olmağla mezbûrân ile ahâlî-i kazâ bi’l-mahalle cem‘ olmadıkça ahadühümâ âhardan imâmete ehakk ve elyak ve muhtâr-ı cemâ‘at idiği ve dîdâr olur mevâddan olmamağla bu sûretde mezbûrân Hâfız Mustafa ve es-Seyyid İsmail bi’l-ma‘iye civârlarında vâki‘ medîne-i Kütahya’ya varıp mesned-nişîn-i şerî‘at-ı garrâ olan efendi huzûrunda ahâlî-i kazâdan tahkīk ve taharrî ve herbiri imtihân kılınarak ref‘ ve tevcîhi husûsu efendi-yi mezbûra havâlesi emr-i savâb olmağla husûs-ı mezkûr medîne-i Kütahya nâibi efendiye havâle kılınması bâbında bir kıt‘a emr-i âlî sudûru re’y-i rezîn-i âtıfet-rehinlerine menût idiği huzûr-ı âlîlerine i‘lâm.
Fî S sene [12]49
|