Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 183 Hüküm no: 231 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi Payoli’nin borcunu ödemesi 115 guruşa hüküm Ma‘rûz Vilâyet-i Rumeli’de Göllükesri kazâsında sâkin Abdülhalim b. İbrahim b. Abdullah’ın oğlu ve tarafından husûs-ı âti’l-beyânda vekîl olduğu kazâ-i mezbûr ahâlîsinden ve asâkir-i mansûre neferâtından Ali Ağa b. Mustafa ve Mehmed Ağa b. Hüseyin nâm kimesneler şehâdetleriyle ber-nehc-i şer‘î sâbit olan asâkir-i mansûre çavuşlarından Selim Ağa b. el-mezbûr Abdülhalim nâm kimesne İstanbul Bâb Mahkemesi’nde meclis-i şer’de kazâ-i mezbûr re’âyâsından ve simidci tâifesinden Payoli v. Ekir nâm zimmî muvâcehesinde babam ve müvekkilim mezbûr Abdülhalim’in mersûm Payoli zimmî zimmetinde bundan akdem kazâ-i mezkûrda mâlından ve yedinden iştirâ ve kabz eylediği ma‘lûmü’l-aded ve’l-fiyat keçi semeninden alacağı olan iki yüz on beş guruşun yüz guruşunu bundan akdem bana edâ ve teslîm etmekle bâkīsi olan yüz on guruşu zimmî-i mersûmdan bi’l-vekâle hâlâ taleb ederim deyü ba‘de’d-da‘vâ ve’l-ikrâr mûcebince meblağ-ı bâkī-i mezkûr yüz on guruşun babam müvekkil-i merkūm içün oğlu vekîl-i mezbûr Selim Ağa’ya edâ ve teslîmiyle mersûm Payoli zimmî ilzâm olunduğu mübâşirleri Bâb-ı Seraskerî kavaslarından Sivaslı İbrahim Kavas kulları yediyle huzûr[-ı âlîlerine i‘lâm olundu] Fî 25 Şevvâl sene [1]255