Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 184 Hüküm no: 232 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın borcunu ödemesi 500 guruş ilzâm Ma‘rûz Aşçı Hasan b. Ahmed nâm kimesne İstanbul Bâb Mahkemesi’nde meclis-i şer‘-i münîrde Hasan Ağa b. Ali nâm kimesne muvâcehesinde mezbûr Hasan Ağa zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği beş yüz guruş alacak hakkım olmağla meblağ-ı mezkûru merkūm Hasan Ağa’dan hâlâ taleb ederim deyü da‘vâ ettikde ol dahi cevâbında müdde‘î-i merkūm meblağ-ı mezkûr beş yüz guruş kabzını ikrâr lâkin benim gāib ani’l-beled el-Hâc Ali Ağa b. İbrahim nâm kimesne zimmetinde cihet-i deyn-i şer‘îden beş yüz guruş alacak hakkım olup medyûnum gāib-i mezbûr deyn-i mezkûruyla beni işbu târîhden üç sene mukaddem İstanbul’da Mahmudpaşa Câmi‘-i şerîfi avlusunda müdde‘î-i merkūm Hasan üzerine üçümüz bir meclisde iken havâle-i mutlaka-i sahîha-i şer‘iye ile havâle ve her birimiz havâle-i mezkûreyi kabûl etmemizle ol vechile müdde‘î-i merkūm cihet-i havâleden beş yüz guruş bana deyni olduğuna binâen meblağ muhâlün-bih-i mezkûr beş yüz guruşu bana edâ ve teslîm etmişidi deyü müdde‘î-i merkūmun inkârına mukārin eylediği def‘ine ikāmet-i beyyine edemeyip bi’t-taleb merkūm Hasan bi’l-muvâcehe ber-nehc-i şer‘î tahlîf olunmağın mûcebince dâfi‘-i merkūm Hasan Ağa def‘-i mezkûruyla müdde‘î-i merkūm Hasan’a bilâ-beyyine mu‘ârazadan ba‘de’l-men‘ sâlifü’l-beyân merkūm Hasan Ağa’nın ikrârıyla lâzım gelen meblağ-ı mezkûr beş yüz guruşun müdde‘î-i merkūm Hasan’a edâsıyla merkūm Hasan Ağa ilzâm olunduğu mübâşirleri [Bâb-ı seraskerî kavaslarından ( ) kavas kulları yediyle huzûr-ı âlîlerine i‘lâm olundu] Fî 16 Şevvâl sene 1255