Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 185 Hüküm no: 234 Orijinal metin no: [31a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köy korusuna yapılan müdahalenin önlenmesi Dahl ü ta‘arruz etmemeğe ta‘ahhüd Ma‘rûz Anadolu’da Alâiye sancağında vâki’ İbradi kazâsına tâbi‘ Orman karyesi ahâlîsinden es-Seyyid Mehmed b. es-Seyyid Hüseyin ve diğer es-Seyyid Mehmed b. el-Hâc Osman ve Mehmed b. Mustafa ve sâirleri İstanbul Bâb Mahkemesi’nde meclis-i şer‘-i münîrde yine sancak-ı mezkûrda vâki’ Manavgat kazâsına tâbi‘ Salur karyesi sükkânından es-Seyyid Ahmed Efendi b. el-müteveffâ Ömer b. Mehmed nâm kimesneler muvâcehesinde ahâlîsinden olduğumuz mârru’z-zikr Orman karyesi hudûdu dâhilinde vâki’ Enif Korusu? demekle şehîr koru ber-mûceb-i Defter-i Hâkānî karyemiz arazisinden olup mine’l-kadîm karyemiz ahâlîleri zabt ü tasarruf edip taraf-ı âhardan dahl ü ta‘arruz olunmak îcâb etmez iken merkūm es-Seyyid Ahmed Ârif Efendi’nin pederi müteveffâ-yı mezbûr hayatında mârrü’l-beyân Salur karyesi vücûhundan olduğuna binâen karye-i mezbûre ahâlîlerini tahrîk birle koru-yı mezkûra bî-vech müdâhaleden hâlî olmamalarıyla ber-minvâl-i muharrer vâki’ olan dahl ü ta‘arruzlarının ma‘rifet-i şer‘le men‘i bâbında yedimizde olup sene-i sâbıkā yani bin iki yüz elli dört senesi Muharremi’l-harâmı’nın evâhiri târîhiyle müverrah bir kıt‘a fermân-ı âlî şeref-efzâ-yı sahîfe-i sudûr buyurulmuş ise de merkūm es-Seyyid Ahmed Ârif Efendi zikri mürûr eden Salur karyesi ahâlîlerini idlâl ve tahrîk edeceği derkâr ve koru-yı mezkûra ahâlî-i mezbûrûnu dahl ü ta‘arruzdan hâlî etmeyeceği emr-i âşikâr deyü ber-minvâl-i muharrer mezbûr es-Seyyid Ahmed Efendi’den iştikâ ve ber-minvâl-i meşrûh müdâhalesinin men‘ olunmasını istid‘â ettiklerinde ol dahi cevâbında müdde‘iyyûn-ı merkūmûnu bi’l-cümle takrîr-i meşrûhlarında tasdîk ve koru-yı mezkûreye minvâl-i muharrer kendisi dahl ü ta‘arruz etmemeğe ta‘ahhüd eylediği huzûr[-ı âlîlerine i‘lâm olundu] Fî 23 Şevvâl sene [1]255