Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 186 Hüküm no: 236 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Talebeden İsmail Efendi’nin eşyalarını aldığı şüphesiyle arkadaşı Seyyid İsmail Efendi aleyhine açtığı davanın geçersiz olduğu Şüphe da‘vâsı meşrû‘a olmadığı Ma‘rûz Talebe-i ulûmdan İsmail Efendi b. Bekir nâm kimesne İstanbul Bâb Mahkemesi’nde meclis-i şer‘-i münîrde yine talebe-i ulûmdan es-Seyyid İsmail Efendi b. el-Hâc Mustafa nâm kimesne muvâcehesinde ben bundan akdem diyâr-ı âhara azîmet eylediğim esnâda İstanbul’da Sultanmehmed Câmi‘-i şerîfi’nde vâki’ Hafızpaşa Medresesi’nde kâin odamı kilitleyip derûnunda mevcûde eşyâm ile terketmiş idim el-hâletü hâzihi oda-i mezkûrem derûnunda mevcûde eşyâmdan bir setri ve bir pantol ve bir fes ve iki yemenî ve beş çevre ve bir yorgan çârşebi ve iki kat câmeşûy <> ve <> [bir] çift tozluk ve iki havlum zâyi‘ olmuş olmağla eşyâ-i mezkûreyi mezbûr es-Seyyid İsmail Efendi ahzetmişdir deyü bana şüphe ârız olmağla öyle olacak eşyâ-i muharrere-i mezkûre bana tazmîne mezbûr es-Seyyid Hafız İsmail Efendi’ye tenbîh olunmak murâdımdır deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i mezbûr İsmail Efendi’ye tefhîm ve da‘vâ-yı mezkûresiyle es-Seyyid İsmail Efendi’ye tenbîh olunduğu huzûr[-ı âlîlerine i‘lâm olundu] Fî 25 Şevvâl sene [12]55