Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 187 Hüküm no: 238 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hanım’ın fuzuli zabtederek başkasına sattığı kocasına aid kıymetli eşyaların bedellerini tazmin etmesi Damânen eşyâ teslîmine tenbîh Ma‘rûz Bâ‘isü’l-i’lâm Mehmed Halim Ağa b. Süleyman nâm kimesne İstanbul Bâb Mahkemesi’nde meclis-i şer’de hâlâ zevcesi mu’arrefetü’z-zât Şerife Fâtıma Hanım’ın pederi ve tarafından husûs-ı [âti]’l-beyânda vekîl olduğu zâtını ârifân Hüseyin Ağa b. Ahmed ve Abdüllatif Ağa b. Halil nâm kimesneler şehâdetleriyle sâbit olan es-Seyyid Halil Efendi b. es-Seyyid Mehmed nâm kimesne muvâcehesinde mahrûse-i Galata’ya muzâfe kasaba-i Tophâne’de Ekmekçibaşı <> mahallesinde vâki’ zevcem müvekkile-i mezbûre ile ma‘an sâkinler olduğumuz menzilde mevcûde mecmû‘u bin üç yüz seksen guruş kıymetli bir nühâs kırmızı mangal ve bir nühâs tepsi ve bir kadâif tebsisi ve sekiz sahan ve bir nühâs çorba tası ve bir nühâs mangal <> tenceresi ve iki kebîr tencere ve bir leğen ma‘a ibrik ve bir süzgeç ve bir küp maşrapası ve bir yumurta tâbesi ve altı duhân tablası ve bir hoşâb kefçesi ve bir delikli kefçe ve bir hamam tası ve altı lenger ve bir güğüm ve bir âbdest leğeni ve bir yemek sinisi ve bir tâbemi zevcem müvekkile-i merkūme fuzûlî ve bi-gayri hak ahz u kabz etmekle eşyâ-i muharrere-i mezkûre mevcûde ise a‘yânını değil ise bi’s-sübût kıymet-i şer‘iyelerini zevcem müvekkile-i merkūmeye izâfetle vekîl-i mezbûreden tazmîn taleb ederim deyü da‘vâ ettikde vekîl-i merkūm cevâbında eşyâ-i muharrere-i mezkûreyi kızı ve müvekkilesi mezbûrenin ber-minvâl-i muharrer ahz u kabz ve üç yüz kırk yedi guruş semen-i makbûza âhara bey‘le istihlâk ve makbûzu olan meblağ-ı mezkûru kızı müvekkilesi merkūme kendi umûruna sarfla <> [istihlâk] eylediğini ikrâr ve müdde‘î-i mezbûrun ziyâde kıymet müdde‘âsını inkâr etmekle müdde‘î-i merkūm ber-vech-i muharrer ziyâde müdde‘âsıyla beyâna ba‘de’l-havâle vekîl-i merkūmun ikrâr ü i‘tirâfı mûcebince lâzım gelen meblağ-ı mezkûr üç yüz kırk yedi guruşu müdde‘î-i merkūm Mehmed Halim Ağa’ya damânen edâ ve teslîme kızı ve müvekkilesi merkūma izâfetle vekîl-i merkūm es-Seyyid Halil Efendi’ye tenbîh olunduğu mübâşirleri Bâb-ı âlî kavaslarından Tırnovalı Hüseyin Kavas kulları yediyle huzûr[-ı âlîlerine i‘lâm olundu] Fî 23 Şevvâl sene 1255