Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 188 Hüküm no: 239 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Halim Ağa’nın hanımının mehrini ödemesi 800 guruş bâkī mu‘accel hükmü Ma‘rûz İstanbul’da Aksaray kurbünde Gurebâ Hüseyin Ağa mahallesinde sâkine mu’arrefetü’z-zât Fâtıma bt. Halil nâm hatun İstanbul Bâb Mahkemesi’nde meclis-i şer‘-i münîrde hâlâ zevci Mehmed Halim Ağa b. Süleyman nâm kimesne muvâcehesinde ben bundan akdem nefsimi bin üç yüz guruş mehr-i mu‘accel ve bin yüz elli guruş mehr-i müeccel tesmiyeleriyle mezbûr Mehmed Halim Ağa’ya tezvîc ve tenkîh eylediğimde ol dahi tezevvüc ve duhûl edip lâkin mehr-i mu‘accel-i mezkûrumun beş yüz guruşunu hîn-i akidde bana def‘ ü teslîm edip mâ‘adâsı olan sekiz yüz guruşunu henüz edâ ve îfâ etmemekle suâl olunup mehr-i mu‘accel-i mezkûrumun mâ‘adâsı olan sekiz yüz guruşu bana edâya zevcim mezbûr Mehmed Halim Ağa’ya tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihâ ikrâr ü i‘tirâf etmeğin mûcebince meblağ-ı bâkī-i mezkûr sekiz yüz guruşu zevcesi müdde‘iyye-i mezbûre Fâtıma Hatun’a edâya mezbûr Mehmed Halim Ağa’ya tenbîh olunduğu huzûr[-ı âlîlerine i‘lâm olundu] Fî 17 Şevvâl sene 1255