|
Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 111 Hüküm no: 89 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Sonisa kazası Zuday köyünde Seyyid Abdülkerim b. İbrahim Vakfi mütevellisi Girayoğlu Ahmed b. Osman’ın vefatıyla yerine oğullarının tayini
Ma‘rûz-ı dâ‘î,
Sâdır olan fermân-ı âlîlerine imtisâlen işbu arz ve derkenâra nazar olundukda vilâyet-i Anadolu’da Sonisa kazâsına tâbi‘ Zuday karye ahâlîsinden es-Seyyid Abdülkerim b. İbrahim nâm sahibü’l-hayrın bâ-temlîknâme-i hümâyûn yedinde mülkü olan kazâ-i mezbûrede ma‘lûmü’l-hudûd dam yeri ve makber arzı ve damlacık nâm mahalleri cem‘an üç kıt‘a mülk arsaları hasbeten lillâhi te‘âlâ vakf ve habs ve şart edip zikrolunan üç kıt‘a arsaları icâre-i misilleriyle bâ-ma‘rifet-i mütevellî âhara îcâr olunup hâsıl olan icâreleri kazâ-i mezbûrede tarîk-ı caddede kâin İlyas köprüsü demekle ma‘rûf cisr-i kebîrin ta‘mîr ve termîmine sarf ve tevliyet-i mastûr hayatda oldukça kendüye ve ba‘de vefâtihî evlâd-ı evlâdına batnen ba‘de batnin ve ba‘de’l-inkırâzi’l-küll re’y-i hâkimle bir mütedeyyin kimesne mütevellî nasb u ta‘yîn edip evlâd-ı vâkıf munkarız olmağla ber-mûceb-i şart-ı vâkıf re’y-i hâkimle tevliyet-i mezkûrun bâ-berat-ı âlîşân mütevellîsi olan Girayoğlu Ahmed b. Osman fevt olup yeri hâlî ve hizmet-i lâzımesi mu‘attal kalmağla mahlûlünden erbâb-ı istihkākdan müteveffâ-yı merkūmun sulbî oğulları es-Seyyid Mustafa ve es-Seyyid Osman ve es-Seyyid Hasan benû Ahmed nâm karındaşlara babaları müteveffâ-yı merkūmun mahlûlünden tevcîh ve müceddeden berat-ı şerîf-i âlîşân sadaka ve ihsân buyurulması kazâ-i mezbûr nâibi es-Seyyid Ali Zühdü Efendi dâ‘îleri işbu mührü mutâbık arzıyla inhâ etmeğin fi’l-hakīka tevliyet-i mezkûre merkūm Girayoğlu Ahmed b. Osman’ın bâ-berat-ı âlî üzerinde olduğu derkenârdan müstebân ve merkūm Girayoğlu Ahmed’in fevti vâki‘ ve merkūmûn es-Seyyid Mustafa ve es-Seyyid Osman ve es-Seyyid Hasan müteveffâ-yı merkūmun sulbî oğulları olduklarını kazâ-i mezbûr ahâlîsinden Der-aliyye’de müsâfiren sâkinler Toruloğlu Mustafa b. Halil ve Kara Hasanoğlu Hasan b. Abdullah nâm kimesnelerin alâ-tarîkı’ş-şehâde haber vermeleriyle zâhir ve nümâyân olmağın bu sûretde tevliyet-i mezkûre ber-mûceb-i şart-ı vâkıf müteveffâ-yı merkūmun mahlûlünden sulbî oğulları mezbûrûn es-Seyyid Mustafa ve es-Seyyid Hasan ve es-Seyyid Osman nâm karındaşlara bi’l-iştirâki’s-seviy tevcîh ve yedlerine müceddeden berat-ı şerîf-i âlîşân sadaka ve ihsân buyurulmak iktizâ eylediği huzûr-ı âlîlerine i‘lâm.
Sene [12]49
|