Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 189 Hüküm no: 240 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal İlya’nın borcunu ödemesi 700 guruş ilzâm Ma‘rûz Papaz Safranyos v. Vasil nâm râhib İstanbul Bâb Mahkemesi’nde meclis-i şer‘-i hatîrde Bakkāl İlya v. Vasil nâm zimmî muvâcehesinde İstanbul’da Balıkpazarı kapısı hâricinde Peynirci sûkunda vâki’ mutasarrıf olduğum bir bâb bakkāl dükkânımda müstecirim olmağla müddet-i ma‘lûm[ede] dükkân-ı mezkûre icâresinden mersûm İlya zimmî zimmetinde alacak hakkım olan iki bin sekiz yüz altmış beş guruşun iki bin yüz altmış üç guruşunu mukaddemâ mesfûrun yedinden kabz ü istîfâ etmemle bâkīsi olan yedi yüz beş guruşu mersûm İlya zimmîden hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin ben deynim olan meblağ bâkī-i mezkûrun dört yüz elli guruşunu bundan akdem müdde‘î-i mersûma edâ ve beş yüz yirmi guruşunu dahi emriyle dâyini gāib-i ani’l-meclis Kostandi zimmîye îfâ etmemle ol vechile cem‘an medfû‘um olan dokuz yüz yetmiş guruş deyn-i bâkī-i mezkûrumun ol mikdârına takās ve mahsûb olunup bâkīsi olan iki yüz doksan beş guruşu müdde‘î-i mesfûr Safranyos’dan istirdâd ederim deyü inkârına mukārin eylediği def‘ine ikāmet-i beyyine edemeyip bi’t-taleb mesfûr Safranyos bi’l-muvâcehe ber-nehc-i şer‘î tahlîf olunmağın mûcebince dâfi‘-i mersûm def‘-i mezkûruyla müdde‘î-i mesfûr Safranyos’a bilâ-beyyine mu‘ârazadan ba‘de’l-men‘ mesfûr İlya zimmînin ikrârıyla lâzım gelen meblağ-ı bâkī-i mezkûr yedi yüz beş guruşun müdde‘î-i mesfûr Safranyos’a edâsıyla mersûm İlya zimmî ilzâm olunduğu mübâşirleri Bâb-ı âlî kavaslarından Seyyid Ali Kavas kulları yediyle huzûr[-ı âlîlerine i‘lâm olundu] Fî 16 Şevvâl sene [12]55