Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 190 Hüküm no: 241 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Nikola’nın alacaklı olduğu yolundaki iddiasını ispatlayamadığı Bilâ-beyyine mu‘ârazadan men‘ Ma‘rûz Arzuhâl eden Dimo v. Nikola nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde mastûrü’l-ism Niko v. Nikola nâm zimmî muvâcehesinde mersûmun zimmetinde yedimde olup târîh-i İseviyye’nin sekiz yüz otuz yedi senesi Martı’nın yirminci günü târîhiyle müverrah Rûmiyyü’l-imlâ bir kıt‘a temessük mantûkunca mâlımdan ve yedimden iktirâz ve kabz ve umûruna sarfla istihlâk eylediği dört yüz altmış altı guruş alacak hakkım olmağla meblağ-ı mezkûru zimmî-i mersûmdan hâlâ taleb ederim deyü ba‘de’d-da‘vâ ve’l-inkâr müdde‘î-i mersûm ber-vech-i muharrer müdde‘âsına ikāmet-i beyyine edemeyip bi’t-taleb mersûm Niko zimmîye bi’l-muvâcehe [ber-vech-i] şer‘î üzere yemîn verilmeğin mûcebince müdde‘î-i mersûm Dimo zimmî da‘vâ-yı mezkûresiyle mersûm Niko zimmîye bilâ-beyyine mu‘ârazadan men‘ olunduğu huzûr[-ı âlîlerine i‘lâm olundu] Fî 19 Şevvâl sene 1255