Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 190 Hüküm no: 242 Orijinal metin no: [32a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine Hanım’ın kıymetli eşyalarının Zarafet Kadın tarafından çalındığı yolundaki iddiasını ispatlayamadığı Bilâ-beyyine mu‘ârazadan men‘ Ma‘rûz İstanbul’da Cerrâhpaşa mahallesinde sâkine sâhibe-i arzuhâl mu’arrefetü’z-zât Şerife Emine bt. Mustafa nâm hatun İstanbul Bâb Mahkemesi’nde meclis-i şer‘-i münîrde derûn-ı arzuhâlde ismi mezkûre kezâlik zâtı mu‘arrefe zenciye Zarafet Kadın bt. Abdullah muvâcehesinde işbu târîh-i i‘lâmdan bir ay mukaddem mezbûre Zarafet Kadın müsâferet tarîkiyle mahalle-i mezbûrede vâki’ menzilime geldiğinde zikr olunan menzil odası derûnunda basma anterimin cebinde mevcûde mecmû‘u yedi yüz guruş kıymetli sîm üzerine masnû‘ bir çift elmas küpe ve iki aded sîm nusha ve bir pazen yemenî ve iki aded Mahmudiye altınımı fuzûlî ve bi-gayri hak ahzetmekle mevcûde ise aynlarını müstehleke ise ba‘de’s-sübût zikr olunan küpe ve yemenî ve nushaların kıymetleriyle altınların emsâllerini mezbûre Zarafet Kadın’dan hâlâ taleb ederim deyü ba‘de’d-da‘vâ ve’l-inkâr müdde‘iyye-i mezbûre ber-vech-i muharrer müdde‘âsına ikāmet-i beyyine edemeyip bi’t-taleb mezbûre Zarafet Kadın bi’l-muvâcehe ber-nehc-i şer‘î tahlîf olunmağın mûcebince müdde‘î-i merkūme Şerife Emine Hatun da‘vâ-yı mezkûresiyle merkūme Zarafet Kadın’a bilâ-beyyine mu‘ârazadan men‘ olunduğu huzûr[-ı âlîlerine i‘lâm olundu] Fî 24 Şevvâl sene 1255