Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 191 Hüküm no: 243 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Efendi’nin vasiyetinin yerine getirilerek Hüsnügül Hanım’a terekesinden bin guruş verilmesi Bi-hükmi’l-vasiyye 1000 guruş ilzâm [Ma‘rûz] Anadolu’da Isparta kazâsında sâkin iken bundan akdem vefât eden Mahmud Efendi b. Mustafa b. Abdullah’ın verâseti vâlidesi Saliha bt. Osman ve li-ebeveyn kız karındaşı Emine hatunlara münhasıra olduğu lede’ş-şer‘i’l-enver zâhir ve mütehakkık oldukdan sonra müteveffâ-yı mezbûrun müdebberesi Hüsnügül bt. Abdullah meclis-i şer‘-i şerîf-i enverde tereke-i müteveffâ-yı mezbûra vaz‘-ı yedleri mütehakkık olan vârisetân-ı mezbûretân Saliha ve Emine hatunlar muvâcehelerinde müteveffâ-yı mezbûr Mahmud Efendi işbu târîh-i i‘lâmdan bir buçuk sene mukaddem hayatında beni tedbîr-i mutlak ile müdebbere eylediği esnâda sülüs-i mâlından vârisetân-ı mezbûretân muvâcehelerinde bana bin guruş vasiyyet ve işhâd edip ba‘dehu vefât etmekle meblağ-ı mezkûru vârisetân-ı mezbûretânın vâzı‘atü’l-yed oldukları mevrûsları müteveffâ-yı mezbûr Mahmud Efendi’nin terekesinin sülüsünden mezbûretân Saliha ve Emine hatunlardan hâlâ taleb ederim deyü da‘vâ ettikde vârisetân-ı mezbûretân Saliha ve Emine hatunlar cevâblarında inkâr etmeleriyle müdde‘iyye-i mezbûre Hüsnügül ber-vech-i muharrer müdde‘âsını her biri lede’t-tezkiye adl ve makbûlü’ş-şehâde idikleri ihbâr olunan el-Hâc Hafız Halil Efendi b. el-Hâc Ahmed ve Ali Ağa b. Süleyman nâm kimesneler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezkûr bin guruşu müteveffâ-yı mezbûrun terekesi sülüsünden müdde‘iyye-i merkūme Hüsnügül’e bi-hükmi’l<>vasiyye edâ ve teslîme mezbûretân Saliha ve Emine hatunlara tenbîh olunduğu İstanbul Bâb Mahkemesi’nden huzûr[-ı âlîlerine i‘lâm olundu] Fî 15 Şevvâl sene 1255